Երեւանի քաղաքապետարանի եւ «Թեքեյան կենտրոն» հիմնադրամի համագործակցությամբ Երեւան քաղաքի պատմության թանգարանում բացվել է Ապրիլյան պատերազմի հերոսների հիշատակին նվիրված գեղանկարչական աշխատանքների ցուցահանդես:
Քաղաքապետարանից NEWS.am-ին հայտնում են, որ «Ազատությունն այլընտրանք չունի. անկախություն» խորագիրը կրող ցուցահանդեսում ներկայացված են Արցախի նոր սերնդի ինը արվեստագետների շուրջ 6 տասնյակ աշխատանքներ՝ գեղանկարներ, քանդակներ եւ գրաֆիկա:
Ցուցահանդեսի բացման հանդիսավոր արարողությանը ներկա էր նաեւ Երեւանի քաղաքապետի տեղակալ Արամ Սուքիասյանը, ով, կարեւորելով նմանատիպ նախաձեռնությունների նշանակությունը, նշեց. «Այսպիսի միջոցառումները գալիս են խնկարկելու մերօրյա հերոսների հիշատակը, ովքեր այլեւս մեզ հետ չեն եւ միեւնույն ժամանակ մեզ հետ են, ու նրանց որոշակի դրսեւորումներ արտահայտվում են այս ստեղծագործություններում»:
Ցուցահանդեսը բաց կլինի մինչեւ ապրիլի 15-ը: