ՀՀԿ հաղթանակին էապես նպաստեց Կարեն Կարապետյանի վարկանիշը: Այս մասին այսօր՝ ապրիլի 11-ին լրագրողների հետ հանդիպման ժամանակ հայտարարել է ՀՀԿ համապետական ցուցակով պատգամավոր ընտրված Խոսրով Հարությունյանը:
Վերջինս շեշտել է, որ ՀՀԿ-ի առավելությունն այն էր, որ նախապես հայտարարեցին կառավարության կազմի, ապագա վարչապետի ու պաշտպանության նախարարի մասին:
Նախկին վարչապետը համարում է, որ նախընտրական պայքարի շրջանում պետք է հայտնի լինեն անկյունաքարային պաշտոնները զբաղեցնողների անունները:
Անդրադառնալով ընտրակաշառքին՝ Խոսրով Հարությունյանն ասել է. «Մենք շատ հաճախ դա լսում ենք նույնիսկ այն կուսակցություններից, որոնք ընտրակաշառք են բաժանել: Դա պայմանավորում են մարդկանց սոցիալական վիճակով: Իմ պատկերացմամբ, խնդիրը հասարական ընկալումների մեջ պիտի վերանայվի, որեւէ արդարացում չպետք է լինի ընտրակաշառքի վերաբերյալ: Երաշխիք չկա, որ ընտրակաշառք վերցնողը կարող է դառնալ չինովնիկ եւ շարունակել այդ վտանգավոր երեւույթը: Ընտրակաշառքն արդեն անիմաստ քայլ է, օգուտ չտվող: Ես ասում եմ՝ դա պախարակելի է, արատավոր երեւույթ է: Չեմ կասկածում, որ մեր առօրյայից այդ երեւույթը դուրս կմղվի, քանի որ քվեն վերահսկելի չէ: Ընտրողների շրջանում պետք է արմատավորվի էս գաղափարը, որ քվեն վերահսկելի չէ»,-ասել է Խոսրով Հարությունյանը:
Նրա խոսքով՝ այս ընտրություններում ճանապարհի, կտուրի վերանորոգման խոստումները էական ազդեցություն չունեցան: