ԱԺ ՀՀԿ խմբակցության ղեկավար Վահրամ Բաղդասարյանը կարծում է, որ եթե 5–6 ուժ կարողանար հայտնվել խորհրդարանում, շատ ավելի ակտիվ կլիներ խորհրդարանը։
«Խորհրդարան չանցած ուժերի հետ պետք է համագործակցությունը շարունակել, քանի որ այդ դուրս մնացած ուժերը լուրջ դերակատարում ունեն քաղաքական դաշտում»,-NEWS.am-ի հետ զրույցում նշել է Վահրամ Բաղդասարյանը:
«Ցավում եմ որոշ քաղաքական ուժերի համար, որ չեն հայտնվել խորհրդարանում, որովհետեւ նրանք իրոք քաղաքական ներկապնակում լուրջ դերակատարում ունեցող անհատներ են եղել, բայց չեմ կարծում, որ այդ համագործակցությունը ավարտվելու է։ Ցանկալի էր, որ 5–6 քաղաքական ուժ լիներ խորհրդարանում, ոչ թե 4։ Իմ կարծիքով՝ 5–6 քաղաքական ուժի դեպքում ավելի ակտիվ պառլամենտ կարող էինք ունենալ»,–ասել է Վահրամ Բաղդասարյանը։
Անդրադառնալով խորհրդարան անցած ընդդիմադիր «Ելք»–ի կողմից ընտրախախտումները չբողոքարկելու որոշմանը, Վահրամ Բաղդասարյանն ասել է. «Եթե չեն բողոքարկել, ուրեմն արդյունքից գոհ են եղել»։
Նշենք, որ ԱԺ ընտրություններում նվազագույն շեմը հաղթահարել են 4 քաղաքական ուժեր՝ ՀՀԿ-ն (58 մանդատ), «Ծառուկյան» դաշինքը (31 մանդատ), «Ելք» դաշինքը (9 մանդատ) եւ ՀՅԴ-ն (7 մանդատ):