Հայաստանի «Նոր քաղաքական մշակույթ» կուսակցության նախագահ Անի Զախարյանի գործով դատական հերթական նիստը հետաձգվել է:
Երեւանի Կենտրոն եւ Նորք Մարաշ վարչական շրջանի դատարանում այսօր՝ ապրիլի 18-ին, ներկաներին հայտնել են, որ նիստը հետաձգվում է, քանի որ դատավոր Արշակ Վարդանյանը դասընթացների է:
NEWS.am-ի հետ զրույցում Անի Զախարյանը նշեց, որ ինքն առայժմ դատարանից բողոքելու որեւէ առիթ չունի, թերացել են միայն քննչական մարմինները:
«Նախնական նախաքննական փուլում է տեղի ունեցել այն ամենը, ինչ որ տեղի է ունեցել, քանի որ առանց որեւէ ակնհայտ փաստի, միայն հինգ ոստիկանի կեղծ ցուցմունքի հիման վրա մեղադրանք է ինձ առաջադրվել եւ գործն ուղարկվել է դատարան, այժմ էլ իմ թանկագին ժամանակը, մասնագիտական եւ գիտական գործունեությունը ստիպված եմ թողնել ու գալ, մասնակցել նիստերին»,- ասաց նա:
Հաջորդ դատական նիստը տեղի կունենա մայիսի 15-ին:
Ըստ մեղադրական եզրակացության` Անի Զախարյանը հուլիսի 19-ին ժամը 20-ի սահմաններում Երեւանի Խորենացի եւ Քրիստափոր խաչմերուկում ինքնաբուխ հանրահավաքի ընթացքում բարձրախոսով հնչեցրել է կոչեր եւ դրդել մի խումբ ինքնությունները չպարզված անձանց կոտրել եւ վնասել այդ պահին հիշյալ խաչմերուկում իր ծառայողական պարտքը կատարող ոստիկանության մեքենան, որի մեջ եղել են ոստիկանության ծառայողներ:
Անի Զախարյանին մեղադրանք է առաջադրվել Քրեական օրենսգրքի 38-185-րդ հոդվածի 2-րդ մասի 3-րդ կետով, այն է` ուրիշի գույքը դիտավորությամբ ոչնչացնելուն կամ վնասելուն դրդելը, որը կատարվել է՝ կապված անձի կամ նրա մերձավորի կողմից իր ծառայողական կամ հասարակական պարտքը կատարելու հետ: Խափանման միջոց է ընտրվել ստորագրություն չհեռանալու մասին:
