Անցած տարվա հուլիսի 29-ին ոստիկանները թիրախավորել էին լրագրողներին, առանձնացրել ցուցարարներից: Այս մասին այսօր՝ ապրիլի 21-ին, լրագրողների հետ հանդիպմանն ասաց Մարդու իրավունքների պաշտպան Արման Թաթոյանը՝ ներկայացնելով հուլիսյան իրադարձությունների վերաբերյալ արտահերթ հրապարակային զեկույցը:
«Հուլիսի 19-ից սկսած բռնություններ են գործադրվել լրագրողների նկատմամբ, օրինակ, հուլիսի 24-ին լրագրող բերման ենթարկվեց եւ ներգրավվեց որպես վկա, ինչն անթույլատրելի է: Հուլիսի 29-ին ոստիկանները թիրախավորել էին լրագրողներին, նրանց նպատակն էր նաեւ պատժել լրատվամիջոցների ներկայացուցիչներին»,- ասաց Արման Թաթոյանը:
Հիշեցնենք, որ «Սասնա ծռեր» զինված խումբը 2016թ. հուլիսի 16-ի լույս 17-ի գիշերը գրավել էր ոստիկանության ՊՊԾ գունդը: Շուրջ երկու շաբաթ տարածքին հարակից Խորենացի փողոցում տեղի էին ունենում բողոքի ցույցեր՝ ի պաշտպանություն խմբի անդամների: Ցույցերի ընթացքում մասնավորապես երկու օր՝ հուլիսի 20-ին եւ 29-ին տեղի էին ունեցել բախումներ ոստիկանների եւ ցուցարարների միջեւ, ոստիկանները հատուկ միջոցներ կիրառելով ցրել էին ցուցարարներին: Հատուկ միջոցների հետեւանքով բազմաթիվ ցուցարարներ մարմնական վնասվածքներ ստացան, այդ թվում լրագրողներ: Լրագրողների նկատմամբ նաեւ բռնություն է գործադրվել:
