Մենք չենք կարող աշխարհի բարոյական առաջնորդը մնալ, եթե տարանջատենք եւ տարբերակենք, թե որ ցեղասպանությունն է հարկավոր ճանաչել: Այս մասին հայտարարել է ԱՄՆ կոնգրեսական Ադամ Շիֆը:
Նրա խոսքով, որպես աշխարհի բարոյական առաջնորդներ, իրենք պարտավորված են պարզորոշ բարձրաձայնել Հայոց ցեղասպանության եւ ցանկացած այլ ցեղասպանության փաստը, անկախ նրանից, թե այն կատարվել է բարեկամի, թե թշնամու, հզոր թե թույլ իշխանության կողմից:
«Մենք չենք կարող հետեւողական մնալ, եթե հայտարարենք, որ Դարֆուրի ցեղասպանությունը ճանաչելու ենք, որովհետեւ Սուդանը թույլ է, իսկ Հայոց ցեղասպանությունը չենք ճանաչելու, որովհետեւ Թուրքիան ուժեղ է: Մենք տեսնում ենք, թե ինչպես է Թուրքիան դեպի ավտորիտար համակարգ սլանում, դեպի մի համակարգ, որը շատ նման է Պուտինի ստեղծած համակարգին: Եվ չկա որեւէ պատճառ, որեւէ բարոյական պատճառ, սակայն նաեւ չկա որեւէ ռազմավարական պատճառ, որպեսզի մենք Հայոց ցեղասպանության հարցում Թուրքիայի ջրաղացի վրա ջուր լցնենք: Ժամանակն է, որ Միացյալ Նահանգները բարձրաձայն, պարզորոշ, հստակ ու միանշանակորեն ճանաչի Հայոց ցեղասպանությունը»,-ընդգծել է նա:
Կոնգրեսականը նկատել է, որ այսօր աշխարհում հայերի համար վտանգավոր ժամանակներ են. «Ժամանակներ, երբ Սիրիայի կամ Իրաքի տարածքներում հայերը ոչնչացման վտանգի առջեւ են, ժամանակներ, երբ տասնյակ հազարավոր փախստականներ, սիրիահայ փախստականներ, ապաստան են գտել Հայաստանում»:
