Քալիֆորնիա նահանգի Փասադենա քաղաքում ոստիկանությունը որոնում է հինգ տարեկան հայ երեխայի, որն անհետ կորել է երեքշաբթի օրը։
KTLA հեռուստաալիքի փոխանցմամբ, 5-ամյա Արամազդ Անդրեասյան կրտսերին հարազատները վերջին անգամ տեսել են սկայպով երեքշաբթի երեկոյան: Մայրը երեխայի անհետ կորելու մասին հայտնել է շաբաթ օրը, երբ երեխայի հայրը չի վերադարձրել նրան տուն։
Երեխայի հորը՝ Հարավային Փասադենայի բնակիչ Արամազդ Անդրեասյան ավագին, գտել են անգիտակից վիճակում՝ իր մեքենայից ոչ հեռու ընկած, իսկ փոքրիկը նրա հետ չի եղել։ 35-ամյա տղամարդուն ձերբակալել են՝ կասկածելով երեխայի առեւանգման մեջ:
Ոստիկանությունը վարժեցրած շների օգնությամբ 5-ամյա տղային որոնում են Արոյո արգելոցի տարածքում, որտեղ գտել են նրա հորը։
Նշենք, որ Արամազդ Անդրեասյանի ծնողները ամուսնալուծվել են մեկ տարի առաջ եւ երեխայի խնամքով հերթով էին զբաղվում։