«Սիրիական ժողովրդավարական ուժերը» (SDF), որոնց հիմքում քրդական ջոկատներն են, իրենց վերահսկողության տակ են վերցրել ռազմավարական ճանապարհները, որոնք տանում են դեպի ԻՊ «մայրաքաղաք» Ռաքքա ու շրջափակել են այն չորս կողմերից, հայտնել է SDF–ի մամուլի քարտուղար Շիհան Շեխ Էհմեդը։
«Մենք կտրել ենք ԻՊ-ի մատակարարման բոլոր ռազմավարական ուղիները։ Կտրել ենք կապը Իրաքի հետ, ազատելով Դեր էզ Զոր տանող ճանապարհը ու մեր հսկողության տակ ենք վերցրել Ռաքքա նահանգի արեւելյան մասը»,- ասել է SDF-ի մամուլի քարտուղարը։
«Հիմա ԻՊ-ն չի կարողանա համալրել իր ուժերն ու զինամթերքը։ Նրանք Ռաքքայում չորս կողմից շրջափակված են»,- հավելել է Շիխան Շեհ Էհմեդը։
Նրա տվյալներով ԻՊ զինյալները սկսել են նահանջել դեպի Ռաքքա ու պատրաստվում են մարտերի քաղաքի մատույցներում։ Քրդերն էլ իրենց հերթին շարունակում են գրոհը։
SDF-ի ներկայացուցչի խոսքով Ռաքքայի ազատագրումը երկար չի տեւի։
