Ամերիկահայ գործարար, 100 LIVES նախագծի համահիմնադիր Նուբար Աֆեյանը հայ ժողովրդին հորդորում է չբավարարվել Հայոց ցեղասպանության վերապրումով, այլ ամեն ինչ անել, որ բոլոր ազգերը մեզանից օրինակ վերցնեն: Այսօր՝ ապրիլի 24-ին, լրագրողների հետ զրույցում Ծիծեռնակաբերդի հուշահամալիր այցելած Նուբար Աֆեյանը նշեց, որ հայ ժողովուրդը կամք եւ հնարավորություն ունի օրինակ դառնալու եւ օգնելու այլ ազգերին, որոնք դրա կարիքն ունեն:
«Պետք է աշխատենք օրինակ դառնալ մյուս ազգերի համար եւ զորանալ՝ ուրիշներին օգնելու համար: Հայ ժողովուրդն այդ հնարավորությունն ունի, միայն մնում է կամք ունենալ՝ այդ ամենին հասնելու համար»,- ասաց նա:
Նուբար Աֆյանը նաեւ անդրադարձավ Հայաստանի ներքաղաքական իրադարձություններին՝ նշեց, որ երկրի իշխանություններն ու ժողովուրդը պետք է ժամանակի ընթացքում զարգանան եւ միջազգային մակարդակի երկիր դառնան. «Մենք այս ճանապարհին ենք, բոլորս անհամբեր ենք, որպեսզի շուտով ամեն ինչ լավանա, եւ մենք դառնանք եվրոպական երկիր»,- ասաց նա:
Հարցին, արդյոք Հայաստանի իշխանությունները երկրում կոռուպցիայի վերացման ուղղությամբ քայլեր են ձեռնարկում, Նուբար Աֆեյանը պատասխանեց, որ, իր կարծիքով, այդ ուղղությամբ որոշ քայլեր արվում են: «Մանավանդ վերջերս տեսնում ենք, որ այդ ուղղությամբ քայլեր արվում են: Ես ապրում եմ ԱՄՆ-ում, եւ այնտեղ եւս վատ երեւույթներ կան, որոնք վերածվում են կոռուպցիայի: Աշխարհի բոլոր երկրներում էլ նման բաներ կան»,- ասաց Աֆյանն ու շարունակեց. «Մենք պետք է մեզ հարց տանք, թե ինչ կուզեին Ցեղասպանության նահատակներ, որ մենք դառնանք որպես ազգ եւ այդ քայլերով շարունակենք»:
