Գերմանիայի Դույսբուրգ քաղաքում Love Parade տեխնո փառատոնի կազմակերպիչներին դատելու են ոչ դիտավորյալ սպանության համար։ 2010-ին փառատոնի ժամանակ սկսված հրմշտոցի հետեւանքով 21 մարդ էր մահացել, եւս 500-ը վնասվածքներ ստացել, հայտնում է BBC–ն։
Դատարանի առջեւ են կանգնելու փառատոնը կազմակերպած Lopavent ընկերության վեց ներկայացուցիչները ու Դույսբուրգի քաղաքապետարանի չորս աշխատակիցները։
Նրանց մեղադրանքներ առաջադրելով՝ Դյուսելդորֆի դատարանը չեղարկել է Դույսբուրգի դատարանի 2016 -ին կայացրած վճիռը, ըստ որի ողբերգության ու կազմակերպիչների գործողությունների միջեւ ուղիղ կապ չի եղել։
Հիմա կազմակերպիչներին ու քաղաքապետարանի աշխատակիցներին սպառնում է մինչեւ հինգ տարի ազատազրկում։
Մեղադրող կողմը համարում է, որ 2010-ի փառատոնի համար, որին ներկա էր մոտ 1․4 մլն մարդ, սարսափելի անհաջող վայր էր ընտրվել։ Հիմնական պարահարթակը գտնվում էր ինդուստրիալ համալիրի տարածքում ու այնտեղ հնարավոր էր հայտնվել միայն երկար թունելի միջով։
Մարդկանց հայտարարվածից երկու ժամ ուշացումով էին թույլ տվել մտնել հրապարակ։ Դրա հետեւանքով թունելում ու ելքի մոտ՝ փոքր հարթակում հսկայական ամբոխ էր կուտակվել։
Սկսվել էր հրմշտոց, ինչի հետեւանքով մահացել էր 21 մարդ՝ այդ թվում ութ օտարերկրացի։ Փորձաքննությունը ցույց էր տվել, որ նրանք բոլորը մահացել էին կրծքավանդակի մասում ուժեղ ճնշման հետեւանքով, բոլորի կողերը կոտրված էին։