Ծննդկան Մերի Մարգարյանի եւ նորածնի մահվան գործով այսօր՝ ապրիլի 25-ին, ցուցմունք տվեց դատաբժշկական հանձնաժողովային փորձաքննության հանձնաժողովի անդամ, ՀՀ գլխավոր գինեկոլոգ-մանկաբարձ Ռազմիկ Աբրահամյանը:
Երեւանի Շենգավիթ վարչական շրջանի ընդհանուր իրավասության դատարանում Ռազմիկ Աբրահամյանը հայտարարեց, որ եթե ինքը լիներ «Շենգավիթ» բժշկական կենտրոնի բժիշկների փոխարեն, հուլիսի 27-ի առավոտյան, երբ արդեն Մերի Մարգարյանի լաբորատոր հետազոտություններում շեղումներ էին հայտնաբերվել, կեսարյան հատում կաներ:
«Ըստ հիվանդության պատմագրի՝ Մերի Մարգարյանի մոտ ՀԵԼԼՓ սինդրոմի ախտանշաններն ի հայտ են եկել 2015թ. հուլիսի 27-ին առավոտյան: Մինչ այդ գիշերը նա ունեցել փսխում, թուլություն, չի բացառվում, որ այդ ժամանակահատվածում էլ ի հայտ եկած լինեն այդ նշանները, բայց քանի որ լաբորատոր հետազոտություններն արվել են ամսի 27-ին առավոտյան եւ նրա մոտ հայտնաբերված է եղել լյարդի ֆեգմենտների փոփոխում, տրոմբոցիտների քանակի նվազում, սրանք հենց խոսում են ՀԵԼԼՓ սինդրոմի մասին: Եթե ես լինեի, հենց այդ ժամանակ կեսարյան հատում կանեի»,- ասաց նա:
Ռազմիկ Աբրահամյանի գնահատմամբ, Մերի Մարգարյանին կարելի էր հոսպիտալացնել դեռ այն ժամանակ, երբ նա հղիությունը վարած բժշկուհուն հայտնել է, որ բարձր ջերմություն է ունեցել:
«Ընդհանրապես, հղիների համար բարձր ջերմություն է համարվում 38-ը, սակայն եթե հղին դիմում է բժշկին եւ ասում, որ նախապես ջերմություն է ունեցել, նա պետք է հոսպիտալացվի: Ցանկալի է եւ անհրաժեշտ հոսպիտալացումը»,- ասաց նա:
Տուժողի իրավահաջորդի ներկայացուցիչ Մարինե Թովմասյանի հարցին՝ հուլիսի 23-ին չհոսպիտալացնելը թերացո՞ւմ էր, Հանրապետության գլխավոր մանկաբարձ-գինեկոլոգը խուսափեց պատասխանել: Ինչ վերաբերում է կեսարյան հատման անհրաժեշտությանը, Ռազմիկ Աբրահամյանը նշեց, որ Մերի Մարգարյանի մոտ բացարձակ ցուցում չի եղել, սակայն երեխայի շահերից ելնելով՝ կարելի էր կեսարյան հատումն անել եւ հավանական է՝ երեխան փրկվեր:
«Կարելի էր նույնիսկ հուլիսի 26-ի լույս 27-ի գիշերը, երբ Մերի Մարգարյանի մոտ փսխում էր եղել, անեսթեզիոլոգը խորհուրդ տար լրացուցիչ հետազոտություններ անել, որոնց արդյունքում էլ հնարավոր կլիներ ավելի շուտ ստանալ պատկերը, քան թե սպասել մինչեւ առավոտ»,- նշեց մասնագետը:
Ամբաստանյալ Շուշանիկ Բախշյանի փաստաբան Ալեքսանդր Սիրունյանը փորձագետից հետաքրքրվեցին՝ անեսթեզիոլոգն ու նյարդաբանն ինսուլտ էին կասկածում, այդ պայմաններում հնարավո՞ր էր կեսարյան հատում իրականացնել:
«Ելնելով պտղի շահերից՝ ցանկալի էր կեսարյան հատում անել՝ անկախ նրանից, թե ինսուլտ կասկածում էին, թե ոչ: Եթե ես լինեի, նորից եմ ասում, հուլիսի 27-ին առավոտյան կանեի կեսարյան հատումը»,- պատասխանեց Ռազմիկ Աբրահամյանը:
Նշենք, որ հուլիսի 28-ին Ռազմիկ Աբրահամյանը «Էրեբունի» բժշկական կենտրոնում մասնակցել էր հրավիրված կոնսիլիումին: Օրենքով, ի դեպ, չի կարող հանձնաժողովի կազմում ընդգրկվել մասնագետ, որը մինչ այդ հիվանդի բուժմանը մասնակցել է: Դատավոր Դավիթ Բալայանը զարմացավ՝ ինչպես կարող էր բուժման ընթացքին մասնակցած մասնագետն ընգրկվեր հանձնաժողովի կազմում եւ քննարկեր բուժման ամբողջ ընթացքը, այդ թվում «Էրեբունի» ԲԿ-ում: Ռազմիկ Աբրահամյանը հայտարարեց, որ ինքը նախապես այդ մասին հայտնել է եւ առողջապահության նախարարությանը, թե հանձնաժողովային փորձաքննության հանձնաժողովի նախագահ Գագիկ Հարությունյանին, սակայն այնուամենայնիվ որոշում է կայացվել իրեն ընդգրկել կազմում:
Դատական նիստը հետաձգվեց եւ նշանակվեց մայիսի 12-ին: Այդ օրը ցուցմունք կտա հանձնաժողովաի նախագահ Գագիկ Հարությունյանը:
Ավելի վաղ Քննչական կոմիտեն հաղորդել էր, որ «Շենգավիթ» ԲԿ-ի բժշկուհի Շուշանիկ Բախշյանը 2015թ. հուլիսի 23-ին հեռախոսակապի միջոցով տեղեկացել է, որ իր հսկողության տակ գտնվող հղի Մերի Մարգարյանն ունեցել է բարձր ջերմություն եւ վերջինիս խորհուրդ է տվել ընդունել «Պարացետամոլ» դեղահաբ։ Հաջորդ օրը հղի կնոջը հրավիրել է բժշկական կենտրոն հերթական կոնսուլտացիայի համար եւ տեղյակ լինելով Մերի Մարգարյանի բարձր ջերմություն ունենալու մասին՝ չի հոսպիտալացրել նրան: Հուլիսի 27-ին, երբ Մերի Մարգարյանը ստացիոնար բուժում է ստացել «Շենգավիթ» ԲԿ-ում, առավոտյան ժամը 09.00-ից սկսած, արյան բիոքիմիական եւ մնացած հետազոտությունների արդյունքում արձանագրվել է արագ ընթացող եւ հղիության հետ կապված զարգացող փոփոխություններ, որի պայմաններում չի կատարվել կյանքի ցուցումով անհապաղ ծննդալուծում, այդ թվում նաեւ՝ կեսարյան հատման միջոցով, ինչի հետեւանքով առաջացած բազմաօրգանային անբավարարությունից հուլիսի 29-ին Մերի Մարգարյանը մահացել է, իսկ հաջորդ օրը մահացել է նաեւ նրա նորածին դուստրը:
Այս գործով երկու մեղադրյալ կա՝ «Շենգավիթ» ԲԿ-ի բժշկուհիներ Շուշանիկ Բախշյանն ու Անի Բաբելյանը:
