Մարդկանց ցանկացած սպանություն մարդկային այլ արարածների կողմից կարող է միայն մեկ արձագանք առաջացնել: Ապրիլի 26-ին՝ Երեւանի պետական համալսարանի պրոֆեսորա-դասախոսական կազմի եւ ուսանողների հետ հանդիպման ժամանակ այս մասին հայտարարեց պաշտոնական այցով Հայաստանում գտնվող Հնդկաստանի փոխնախագահ Մոհամմադ Համիդ Անսարին:
Պատասխանելով ուսանողներից մեկի այն հարցին, թե իր այցը Հայաստան ի՞նչ կարող է փոխել Հայոց ցեղասպանության ճանաչման տեսակետից, Անսարին նշեց. «Սա պատմության հատված է, որով ոչ ոք չի կարող հպարտանալ: Այսօր առավոտյան ես կարդում էի այս հարցի վերաբերյալ բրիտանացի լրագրող Ռոբերտ Ֆիսքի հոդվածը: Նա հարց է բարձրացնում, որի պատասխանը գտնելը որոշակի երկրների համար դժվար է: Ես այդ երկրները չեմ անվանի, քանի որ դա մեզ այլ ուղղությամբ կտանի: Անմեղ մարդկանց սպանության վերաբերյալ 2 կարծիք լինել չի կարող՝ լինի այս տարածաշրջանում, հարեւան տարածաշրջանում, Ասիայի, Աֆրիկայի, Լատինական Ամերիկայի որեւէ հատվածում: Մենք պարտավոր ենք ստորագրել համընդհանուր արժեքների տակ: Սա նշված է ՄԱԿ-ի 1945 թվականի Հռչակագրում: Եվ մենք պետք է այդ արժեքներին ամբոջությամբ հավատարիմ լինենք: Հետեւաբար՝ ոչ մի հակասություն չկա՝ այն, ինչը վատ է՝ վատ է եւ պետք է վատ անվանվի»:
Հիշեցնենք, որ Հնդկաստանի փոխնախագահը Հայաստան երկօրյա այցի շրջանակում ապրիլի 25-ին այցելել է Հայոց ցեղասպանության զոհերի հուշահամալիր եւ հարգանքի տուրք մատուցել մարդկության դեմ սարսափելի հանցագործության անմեղ զոհերի հիշատակին: