Անգլիայի առաջնությունում ինտրիգը մինչեւ վերջ պահպանվում է: Եթե չեմպիոնության հարցը գրեթե լուծված է, ապա քառյակում հայտնվելու թեժ պայքարը՝ ոչ, քանի որ Մանչեսթերը ներկայացնող երկու թիմերն էլ ցանկանում են եկող մրցաշրջանում խաղալ չեմպիոնների լիգայում: «Յունայթեդը» դեռ ունի խաղեր Եվրոպայի լիգայում, իսկ «Սիթին», կիրակի օրը պարտվելով «Արսենալին» Անգլիայի գավաթի կիսաեզրափակչում, այս տարի զրկվեց բոլոր տիտղոսների հույսերից եւ միակ թիրախը լինելու է Պրեմիեր լիգան:
Թիմերի այս մրցաշրջանի առաջին խաղում «Սիթին» հաղթեց 2-1 հաշվով:
«Սիթի»
Խոսեպ Գվարդիոլայի թիմն այս մրցաշրջանում տանը միայն մեկ պարտություն է ունեցել՝ դեկտեմբերի 3-ին, դրանից հետո 11 խաղ է՝ նրանք տանը «Էտիհադում» չեն պարտվում: ԱՊԼ-ում վերջին երկու խաղերում «Սիթին» հաղթանակ է տոնել՝ խփելով երեքական գնդակ ամեն խաղում: Այս պահին քաղաքացիները 64 միավորով մրցաշարային աղյուսակի 4-դ տեղում են, իսկ ՄՅՈՒ-ն նրանցից հետ է միայն մեկ միավորով:
«Յունայթեդ»
«Մանչեսթեր Յունայթեդը» արդեն 23 տուր է չի պարտվում: Վերջին երեք խաղերում Մոուրինյոյի սաները հաղթել են չոր հաշվով: Ընդհանուր առմամբ, արդեն 338 րոպե ՄՅՈՒ-ն սեփական դարպասը գնդակ չի ընդունում: Մրցաշարի վերջին 15 արտագնա խաղերում ՄՅՈՒ-ն 33 միավոր է վաստակել, խփել 27 եւ բաց թողել 13 գնդակ:
Կորուստներ եւ խնդիրներ
Իկլաի Գյունդոգանը, Բակարի Սանյան ու Ջոն Սթոունսը չեն օգնի «Սիթիին» նաեւ այս խաղում: Հարցականի տակ է նաեւ Գաբրիել Ժեզուսի եւ Դավիդ Սիլվայի մասնակցությունը:
«Մանչեսթեր Յունայթեդի» հիմնական կազմի շատ ֆուտբոլիտներ վնասվածք ունեն՝ Զլատան Իբրահիմովիչը, Խուան Մատան, Պոլ Պոգբան, Ֆիլ Ջոնսը, Քրիս Սմոլինգը եւ Ռոխոն:
Կենտրոնական ֆուտբոլիստներ
«Մանչթեսեր Սիթիի» ակնհայտ առաջատարն է դարձել Քեվին դե Բրյոինեն: Բելգիացին այս մրցաշրջանում դարձել է 13 գոլային փոխանցման հեղինակ:
«Մանչեսթեր Յունայթեդում» բոլոր հույսերը կապվում են Հայաստանի հավաքականի ավագ Հենրիխ Մխիթարյանի հետ: Մխիթարյանը գտնվում է շատ լավ մարզավիճակում եւ հարձակման գծի ֆուտբոլիստներից մի քանիսի բացակայության արդյունքում Ռեշֆորդի հետ միասին լինելու է «Սիթիի» պաշտպանների գլխացավանքը:
Կանխատեսում
Հաշվի առնելով ՄՅՈՒ-ի կադրային խնդիրները ու «Սիթիի» ոչ ստաբիլ խաղը` կարելի է ենթադրել, որ գոլառատ խաղ չի սպասվի: Կարելի է ենթադրել անգամ ոչ ոքի արդյունքը:
Վերա Մարտիրոսյան
