Հայաստանի կառավարությունը վերանայել է աղքատության կրճատման ռազմավարությունը: Այս մասին, Ժնեւում «Կայուն զարգացում ՄԱԿ-ի Եվրոպական Տնտեսական Հանձնաժողովի (ԵՏՀ) տարածաշրջանում» խորագրով տարածաշրջանային համաժողովի եւ Եվրոպական տնտեսական հանձնաժողովի 70-ամյակին նվիրված «2030թ.-ին ընդառաջ տնտեսական ինտեգրում եւ համագործակցություն» խորագրով ԵՏՀ նստաշրջանի ժամանակ իր խոսում նշել է ՀՀ ԱԳ նախարարի տեղակալ Աշոտ Հովակիմյանը:

ԱԳՆ-ից NEWS.am-ին հայտնում են, որ փոխնախարար Հովակիմյանը, մասնավորապես, նշեց, որ ՄԱԿ-ի Եվրոպական տնտեսական հանձնաժողովն իր գործունեության ընթացքում մեծ դերակատարություն է ունեցել տարածաշրջանի տնտեսական զարգացման գործում: Փոխնախարար Հովակիմյանի խոսքերով, ԵՏՀ-ն, առաջնորդվելով Միավորված ազգերի կազմակերպության կանոնադրության նպատակներով եւ սկզբունքներով, նպաստում է եվրոպական երկրների համագործակցության ամրապնդմանն ինչպես միմյանց, այնպես էլ այլ երկրների հետ, ինչպես նաեւ տնտեսական ինտեգրմանը` Կայուն զարգացման 2030 օրակարգի համաձայն։

Աշոտ Հովակիմյանը նշեց նաեւ, որ Հայաստանի կառավարությունը վերանայել է աղքատության կրճատման ռազմավարությունը՝ թիրախավորելով մարդկային կապիտալի զարգացման, զբաղվածության ավելացման, սոցիալական պաշտպանության համակարգի բարելավման եւ հանրային կառավարման ինստիտուցիոնալ արդիականացման ուղղությունները։