«Ծառուկյան» դաշինքի պատգամավորական մանդատների հետ կատարվողը իրենց ներքին գործն է, մենք դրանով չենք զբաղվում: Մայիսի 5-ին՝ 5-րդ գումարման ԱԺ վերջին ճեպազրույցի ժամանակ հայտարարեց Հանրապետական կուսակցության երկայացուցիչ Վահրամ Բաղդասարյանը:
Ի պատասխան այն հարցին, որ շատ քաղաքագետներ այս ենթատեքստում համոզմունք են հայտնել «Ծառուկյան» դաշինքի շուրջը ծավալված սկանդալում իշխանությունների ոչ հրապարակային միջամտության մասին, Բաղդասարյանը նշեց. «Շնորհակալ եմ, որ բավականին բարձր եք գնահատում իշխանության դերակատարումը: Ես նույնպես կարծում եմ, որ երկրում առանցքային ուժը Հայաստանի Հանրապետական կուսակցությունն է: Բայց եւս մեկ անգամ ասում եմ՝ սա նրանց ներքին գործն է, մենք դանով չենք զբաղվում: Նման իրավիճակներում մշտապես մեղավորներ են փնտրում, եւ որպես թիրախ խոսում են ՀՀԿ-ի մասին: Մենք չենք խառնվում մյուս կուսակցությունների ներքին գործերին: Եթե նրանք ինքնուրույն չեն կարողանում բոլոր հարցերը պարզել, դրանով կզբաղվեն իրավապահ մարմինները»:
Հիշեցնենք, որ մայիսի 3-ին Կենտրոնական ընտրական հանձնաժողովի հերթական նիստի ժամանակ «Ծառուկյան» դաշինքի 23 պատգամավորներից 12-ը հրաժարվել են ավելի վաղ ներկայացրած ինքնաբացարկի դիմումներից: Նրանք որոշել են չհրաժարվել պատգամավորական մանդատից: