Գյումրիում տեղակայված ռուսական ռազմաբազան կգործարկվի միայն Հայաստանի դեմ ագրեսիայի դեպքում: Մայիսի 17-ին՝ լրագրողների հետ հանդիպման ժամանակ այս մասին ասաց պաշտպանության նախկին նախարար Վաղարշակ Հարությունյանը:
Անդրադառնալով ՌԴ ԱԳ նախարար Սերգեյ Լավրովի հայտարարությանը, որ Գյումրիում տեղակայված ռազմական բազան պատրաստ է դիմակայելու «Իսլամական պետություն» ահաբեկչական խմբավորման գործողություններին՝ Հարությունյանը նշեց, որ Լավրովի խոսքը ենթադրել է այն շրջանակը, որում բազան գործում է: «Չկա այնպիսի փաստաթուղթ, որում նշված է, որ որեւէ կողմ կարող է միակողմանի կարգով բազան օգտագործել»,- ընդգծեց Հայաստանի պաշտպանության նախկին նախարարը:
Հիշեցնենք, որ Ռուսաստանի ԱԳ նախարար Սերգեյ Լավրովը, մասնավորապես, հայտարարել էր. «Համապատասխան ստորաբաժանումները, որոնք տեղակայված են Տաջիկստանում, Ղրղզստանում եւ Հայաստանում եւ ՀԱՊԿ անդամ երկրների կողմից մտել են Օպերատիվ արձագանքման հավաքական ուժերի կազմի մեջ, գործողությունների համար մշտական պատրաստականության վիճակում են: Մինչեւ այս վարակի ոչնչացումը, այս առաջնահերթությունները կպահպանվեն»:
