Aurora Prize for Awakening Humanity միջազգային մրցանակաբաշխության առաջին դափնեկիր Մարգարետ Բարանկիթսը՝ Բուրունդիից, մայիսի 20-ին այցելել է Ծիծեռնակաբերդ հուշահամալիր։
Նրան ուղեկցում էին Հայոց ցեղասպանության թանգարան- ինստիտուտի տնօրեն Հայկ Դեմոյանն ու Aurora նախաձեռնության ղեկավար Արման Ջիլավյանը։ Մրագարետ Բարանկիթսը ծաղիկ է դրել հավերժ կրակի մոտ՝ 20-րդ դարի առաջին ցեղասպանության անմեղ զոհերի հիշատակին։ Նա ծառ է տնկել հուշահամալիրի ծառուղում ու այցելել Հայոց ցեղասպանության թանգարան- ինստիտուտ, որտեղ բացվել է Ավրորա Մարդիգանյանին նվիրված հատուկ սրահ։
NEWS.am-ի թղթակցի այն հարցին, թե ինչ կոչ է նա ուզում անել բոլոր նրանց, ովքեր դեռ հերքում են Հայոց ցեղասպանության փաստը, Մարգարետը նշեց․ «Ես ուզում եմ նրանց բոլորին ասել, որ Ցեղասպանությունը հերքելը շատ մեծ սխալ է։ Շատ կարևոր է կարեկցանք ունենալը։ Մենք մեկ մարդկային ընտանիք ենք՝ եթե հայերը տուժել են ցեղասպանությունից ու շատերն ասում են, որ նման բան չի եղել՝ դա շատ ու շատ մեծ սխալ է։ Մենք պետք է նրանց կոչ անենք լինել կարեկցանքի մի մասը, քանի որ մենք բոլորս մեկ ընտանիք ենք, Աստծու երեխաները։ Այսօր Հայոց ցեղասպանությունը պետք է մարդկությանը ստիպի գիտակցել, որ դա այլևս չպետք է կրկնվի»։ ՏԵսած լուսանկարներից ու լսած պատմություններից արդեն հուզված՝ նա ասում է, որ այնպիսի տպավորություն է, որ մարդիկ այդպես էլ չեն կարողացել հասկանալ, որ այդ հանցագործությունները իրականում կատարվել են։ «Բայց միաժամանակ ես ուզում եմ շնորհավորել հայ ժողովրդին, որ պահպանել է իր արժանապատվություն ը ու ինչ- որ չափով կարողացել է հաշտվել իր սեփական պատմության հետ, համարձակվելով շրջել պատմության այդ դաժան էջը, որպեսզի սկսվեն ավելի լուսավոր ժամանակներ։ Դա ինձ հույս է ներշնչում, որ վաղը ցեղասպանություններ այլևս չեն լինի։ Ես շնորհավորում եմ նաև հայ կանանց։ Նրանց լուսանկարները ու պատմությունները ցույց են տալիս, թե նրանք ինչ լուսավոր հոգիներ ունեն ու ինչպիսի արժանապատվություն։ Եվ դա ինձ հույս է ներշնչում իմ երկրի՝ Բուրունդիի համար, որը հիմա պայքարում է անցյալի, ներկայի ու ապագայի միջև, իսկ միջազգային համայնքը ոչ մի կերպ չի արձագանքում դրան»,- ամփոփեց ՄԱրգարետ ԲԱրանկիտսը։
Այցի վերջում նա գրություն թողեց Սգո գրքում «Ամբողջ սրտով ես շնորհակալ եմ հպարտ հայ ժողովրդին՝ քաջության համար։ Այո, սերը միշտ հաղթանակում է»։
Մարգարետ Բարանկիտսը Բուրունդիի հիվանդանոցից փրկել էր հազարավոր կյանքեր ու հոգ տարել որբերի ու փախստականների մասին քաղաքացիական պատերազմի տարիներին։ 2016-ի ապրիլի 24-ին նրան մրցանակը հանձնել էր հոլիվուդյան դերասան Ջորջ Քլունին։
