Գյումրիում ռուսական ռազմաբազայի զինծառայողի սպանության գործով նշանակված փորձաքննությունների պատասխանները դեռ պարզ չեն: Այս մասին այսօր՝ մայիսի 22-ին, NEWS.am-ի հետ զրույցում ասաց ռուս զինծառայողի սպանության մեջ մեղադրվող Արման Ջանջուղազյանի շահերի պաշտպան Գուրգեն Հարությունյանը: Նա նշեց, որ քրեական գործի նախաքննության գաղտնիությունից ելնելով՝ մանրամասներ չի կարող հրապարակել՝ վստահեցնելով, որ իր պաշտպանյալը հոգեկան խնդիրներ ունի:
Արման Ջանջուղազյանը հրաժարվել է հանրային պաշտպան Սյուզան Խչեյանի պաշտպանությունից:
Ռուս զինծառայողի սպանության գործով նշանակվել են փորձաքննություններ՝ դատաբժշկական, դատաքրեագիտական, դատակեսնաբանական:
Ավելի վաղ տեղեկացրել էինք, որ Գյումրիում ռուսական 102-րդ ռազմաբազայի պայմանագրային զինծառայողի սպանության կասկածանքով ձերբակալվածը հոգեկան առողջության հետ կապված որոշ խնդիրներ ունի:
Սպանության փաստով հարուցվել է քրեական գործ՝ 104-րդ հոդվածի 1-ին մասի հատկանիշներով։ Կատարվում է նախաքննություն՝ դեպքի մանրամասները պարզելու համար։ Սպանվածի անձը հաստատվել է. նա պայմանագրային զինծառայող Դմիտրի Յալպաեւն է, 21 տարեկան: Սպանությունը կատարելու կասկածանքով ձերբակալվել է 20-ամյա Ջ.Ա.-ն:
