Մայիսի 22-ին Փարիզի առաջին ատյանի դատարանը քննել է Բորիս Բուայոնի՝ Իրաքում ու Թունիսում Ֆրանսիայի նախկին դեսպանի ու Սարկոզիի նախկին խորհրդականի գործը։ 47-ամյա դիվանագետին, որին բռնել էին խոշոր կանխիկ գումարով, մեղադրում են մի քանի հոդվածներով, որոնցից են «փողերի լվացումն ու հարկերից խուսափելը» եւ «մսխումը» , փոխանցում է RFI-ն։
Նրա ոճը, որը նման է «Սեւազգեստ մարդիկ» ու «Ջեյմս Բոնդ» ֆիլմերի հերոսների ոճին ու շիտակ արտահայտվելու նրա սովորությունը բնորոշ չեն ֆրանսիական դիվանագիտական շրջանակներին, գրում է Le Monde-ը։ Մի անգամ նա լուսանկարվել էր թունիսյան գլամուրային ամսագրի համար սեւ կոստյումով ու սպիտակ վերնաշապիկով։
2016-ի նոյեմբերից Ֆրանսիայի ԱԳՆ-ն դադարեցրել է նրա կարիերան, այն բանից հետո երբ նրա գործը ուղարկվել է դատարան։
2013-ի հուլիսի 31-ին Փարիզի Հյուսիսային կայարանում Բուայոնին ձերբակալել էին կանխիկ գումարով լի պայուսակով։ Բուայոնը մտադիր էր Բրյուսել ուղեւորվել։ Պայուսակում 350 000 եվրո ու 40 000 դոլար կար։
Քննությանը համոզիչ չեն թվացել այդ գումարի ծագման մասին բացատրությունները, բացի դրանից Բուայոնը չէր հայտարարագրել գումարը մաքսատանը։
Նրա փաստաբանները դատավարությունից առաջ հայտնել էին, որ իրենց պաշտպանյալը մտադիր չէ օգտվել լռության իրավունքից ու ուզում է բացատրություններ տալ՝ վերջ տալու համար դատախազության ֆանտազիաներին։
Ավելի վաղ Բուայոնը քննիչներին հայտնել է, որ այն գումարը, որը հայտնաբերել են նրա մոտ, նա վաստակել է «ձեռներեցային գործունեությամբ» Իրաքում։ Նա նաեւ հավաստիացրել է, որ այդ գումարը հայտարարագրված է հարկային տեսչությունում։
Դատախազության ներկայացուցիչները իրենց հերթին հավաստիացնում են, որ չեն կարողացել հայտնաբերել այդ գումարների ծագումը։
Բուայոնուին հիմա սպառնում է մինչեւ 5 տարի ազատազրկում։