«Ծառուկյան» դաշինքից ԱԺ փոխխոսնակ Միքայել Մելքումյանի աշխատասենյակում փակցված է Սերժ Սարգսյանի լուսանկարը: Ընդդիմադիր հռչակված խմբակցության ներկայացուցիչ փոխխոսնակին աշխատասենյակը տրամադրվել է անցած շաբաթվանից:
NEWS.am-ի հարցին, թե ինչո՞ւ է ընդդիմադիր խմբակցության փոխխոսնակի գլխավերեւում դեռեւս Սերժ Սարգսյանը «իշխում», Մելքումյանն արձագանքեց՝ բազմանշանակ ժպտալով, ապա պնդեց՝ միեւնույն է հարցազրույց չի տալու ոչ մի թեմայի վերաբերյալ: Իսկ երբ փորձեցինք լուսանկարել, վրդովվեց ու ձեռքով փակեց հեռախոսը, աշխատասենյակից «դուրս հրավիրեց»՝ արգելելով լուսանկարել:
Լուսանկարի շուրջ քննարկումից հետո Մելքումյանն օգնականին հանձնարարեց ոչ ոքի ներս չթողնել, իսկ ավելի ուշ ԱԺ միջանցքում ասաց, որ մեկ ժամ է՝ ինչ տեղափոխվել է եւ չի հասցրել փոփոխություններ կատարել։ Մինչդեռ աշխատասենյակն արդեն կոսմետիկ վերանորոգվել է, կահույքն էլ՝ մասամբ փոխվել, սակայն Սերժ Սարգսյանի լուսանկարին չեն դիպել:
«Ծառուկյան» խմբակցության ղեկավար Գագիկ Ծառուկյանի լուսանկարը եւս դեռ չէր հասցրել տեղափոխել նոր «նստավայր»։ Ի դեպ, այն նախկինում եղել է ԱԺ աշխատակազմի նախկին ղեկավար Հրայր Թովմասյանի աշխատասենյակը: