Google կորպորացիան տեղեկություններ է հավաքում իր օգտատերերի նախապատվությունների մասին՝ հետևելով նրանց գործունեությանը համացանցում։  Կախված նրանից, թե մարդը ինչ է որոնում համացանցում ու ինչ ապրանքներ է գնում, նա որոշակի գովազդներ է տեսնում կայքերում։  Սակայն հիմա ինտերնետային հսկան որոշել է այդ պրակտիկան տարածել համացանցից դուրս՝ այսուհետ Google-ը կհավաքի տվյալներ ոչ միայն առցանց, այլև օֆլայն գնումների մասին։ Դա հնարավոր կդառնա վարկային ու դեբետային քարտեր թողարկող ԱՄՆ առաջատար ֆինանսական ընկերությունների հետ Google-ի պայմանագրի շնորհիվ։  

Այդ համաձայնագրերի համաձայն՝ Google-ը կսկսի ստանալ կոդավորված տեղեկություններ ԱՄՆ քաղաքացիների իրականացրած տրանզակցիաների 70 տոկոսի մասին, հետո այդ տեղեկությունն ավտոմատ համեմատվելու է համացանցում գովազդային հայտարարությունների վրա օգտատերերի քլիքների հետ։ Այսպիսով ընկերությունը, որը օգտվում է Google AdWords գովազդային ծառայությունից, կկարողանա պարզել, արդյոք  գովազդն ազդել է այս կամ այն ապրանքը գնելու՝ հաճախորդի որոշման վրա։ Նախկինում նման տեղեկությունը հնարավոր էր միայն ինտերնետային առևտրի ոլորտում։  Իսկ եթե մարդիկ գնումները առցանց չէին կատարում, գովազդատուները կարող էին եզրակացնել, որ իզուր են գովազդի համար այդքան գումարներ վատնել  

Կորպորացիան համարում է, որ իր մտադրությունը չի սպառնում քաղաքացիների մասնավոր կյանքին, քանի որ ոչ Google-ի աշխատակիցները, ոչ գովազդատուները չեն կարողանա ձեռք բերել տեղեկություններ այն մասին, թե որքան գումար է ծախսել օգտատերը, կամ պարզել նրա անունն ու մյուս անձնական տեղեկությունները։