Մեծ Բրիտանիայի վարչապետ Թերեզա Մեյն ԱՄՆ նախագահ Դոնալդ Թրամփի հետ կքննարկի Մանչեսթերի ահաբեկչության հետաքննության ընթացքի մասին տեղեկատվության արտահոսքը: BBC-ի հաղորդմամբ՝ New York Times-ում պայթյունի վայրից իրեղեն ապացույցների լուսանկարների հրապարակումը զայրացրել է բրիտանական իշխանություններին:
Ակնկալվում է, որ Մեյը հարցը կբարձրացնի Բրյուսելում մեկնարկելիք ՆԱՏՕ-ի գագաթնաժողովի ժամանակ Թրամփի հետ հանդիպմանը:
Լուսանկարները New York Times-ում հրապարակվել էին չորեքշաբթի: Պարբերականին հաջողվել էր լուսանկարներ ձեռք բերել, որոնք, իբր, բրիտանացի քննիչներն արել են ողբերգության վայրում: Դրանցում պատկերված են ուսապարկի կտորներ, ինչպես նաեւ սարք, որը «հնարավոր դետոնատոր» է համարվում:
Բացի այդ՝ ենթադրյալ մահապարտ-ահաբեկիչ Սալման Աբեդիի անունն ամերիկյան մամուլում հայտնվել է ողբերգությունից ընդամենը 24 ժամ անց:
Լուսանկարների հրապարակումը զայրացրել է Մեծ Բրիտանիայի կառավարությանը, այդ թվում՝ ոստիկանությանը: Այստեղ կարծում են, որ հրապարակումները կարող էին վնասել հետաքննությանը: