Թերթին հարցազրույց է տվել է Հայաստանում Իսրայելի նորանշանակ դեսպան Շմուել Մեյրոմը: Ներկայացնում ենք զրույցից մի հատված:
Կան կարծիքներ, թե թուրքական կառավարությունը, մասնավորապես վարչապետ Էրդողանը, հակաիսրայելյան կեցվածք է որդեգրել՝ առաջիկա ընտրություններում լրացուցիչ քվեներ ապահովելու համար։ Հիմքեր կան կարծելու, որ նա խաղում է։ Օրինակ, ինչպիսի՞ն եղավ Էրդողանի արձագանքը երկու տարի առաջ Գազայում Ձեր ռազմական կամպանիային։ Նա դռներ շրխկացրեց, բղավեց, հերոսի կեցվածք ընդունեց տեսախցիկների առջեւ, բայց ներեցեք, ՄԱԿ-ի Անվտանգության խորհրդում Իսրայելի ինտերվենցիայի հարցը չբարձրացրեց, թեեւ այդ ժամանակ Թուրքիան ԱԽ-ի ոչ մշտական անդամ էր:
Հնարավոր է Էրդողանի վարքագծում որոշ զգացական, քաղաքական մոտիվացիա ունեցող չափազանցումներ կան, բայց իրենց արտաքին քաղաքականությունում կատարվող տեղաշարժն արմատական է։ Իշխանության գալուց ի վեր Էրդողանի արտաքին քաղաքականության խորհրդատուն եւ գաղափարախոսը պարոն Դավութօղլուն է։ Նա դիվանագետ չէ, այլ ակադեմիական շրջանակներից եկած փիլիսոփա է... դրա համար էլ մտորում է վաղուց վերացած Օսմանյան կայսրությունը վերակենդանացնելու կամ դրա ազդեցությունը վերագտնելու շուրջ։ Իսրայելի հետ հարաբերություններն այդ տեղաշարժի մի մասն են միայն։ Ոմանք ասում են՝ Թուրքիան հեռանում է Արեւմուտքից, փոխում է կողմնորոշման առանցքը, մերձենում է ռադիկալ երկրների հետ, ինչպիսին են Իրանը, Սիրիան, եւ դա անհանգստացնող է: