Ուբաթ 89 տարեկանում վախճանված քաղաքագետ Զբիգնեւ Բժեզինսկին կյանքի վերջին ամիսներին աշխատում էր Ասիայի կայսերական ավանդույթների եւ եվրասիական երկրների արդի արտաքին քաղաքականության կապի մասին գրքի վրա, նշված է Ռազմավարական եւ միջազգային հետազոտությունների ամերիկյան կենտրոնի հայտարարության մեջ, փոխանցում է «ՌԻԱ Նովոստի»-ն:
Բժեզինսկին 1981 թվականից աշխատում էր Ռազմավարական եւ միջազգային հետազոտությունների կենտրոնում, համարվում էր այս հեղինակավոր վերլուծական ինստիտուտի խորհրդականը, վարչության անդամը եւ խորհրդատվական խորհրդի համանախագահը:
«Մահվանից առաջ, մի քանի ամիս Բժեզինսկին աշխատում էր վերջին գրքի վրա, որում ուսումնասիրել է Ասիայում կայսերական հակամարտող ավանդույթները եւ այն, թե դրանք ինչպես են անդրադառնում Եվրասիայի հիմնական երկրների արտաքին քաղաքականության վրա»,- Կենտրոնի կայքում նշել է նախագահ Ջոն Համրը:
ԱՄՆ նախագահ Ջիմի Քարթերի ազգային անվտանգության հարցերով նախկին խորհրդական, հայտնի քաղաքագետ Զբիգնեւ Բժեզինսկին վախճանվել է 89 տարեկանում, հայտնել է նրա դուստր Միկան: New York Times պարբերականի տեղեկություններով՝ Բժեզինսկին մահացել է ուրբաթ օրը, Վիրիջինիայի հիվանդանոցներից մեկում:
Բժեզինսկին քաղաքականության վերաբերյալ բազմաթիվ գրքերի եւ հոդվածների հեղինակ է: Դրանցից ամենահայտնիներն են՝ «Երկու դարաշրջանների միջեւ. Ամերիկայի դերը տեխնոիշխանության դարաշրջանում» (1970) եւ «Շախմատային մեծ տախտակ. ամերիկյան գերակայությունը եւ նրա աշխարհառազմավարական հրամյականները» (1997):
