Լրագրողին առավելություն է տալիս ոչ թե բեյջը, այլ նրա հաղորդած տեղեկության նկատմամբ մարդկանց հավատը։ Այս մասին NEWS.am-ի թղթակցի հետ զրույցում հայտարարեց Պուլիցերյան կրկնակի մրցանակակիր, Boston Globe պարբերականի Վաշինգտոնի գրասենյակի նախկին ղեկավար Սթիվ Քյուրքչյանը։
«Մենք՝ լրագորղներս, ներկայացնում ենք հասարակությունը, աղքատ մարդկանց, որոնք կարիքի մեջ են հայտնվել տնտեսության, կրթության եւ մի շարք այլ պատճառներով։ Մենք պետք է ճանապարհ գտնենք՝ այդ մարդկանց պայմաները երկրի ղեկավարությանն ավելի ըմբռնելի դարձնելու համար։ Աշխարհը երկու շերտի է բաժանվում՝ հարուստների եւ աղքատների։ Լրատվամիջոցների պարտականությունն է՝ ցույց տալ, թե որքան բարդ է կյանքն աղքատների համար»,- ընդգծել է Սթիվ Քյուրքչյանը։
Որպես Boston Globe պարբերականի Վաշինգտոնի գրասենյակի ղեկավար նրա հաջողության գաղտնիքի վերաբերյալ հարցին ի պատասխան՝ Քյուրքչյանն ընդգծել է. «Մամուլի ազատությունը։ Իմ առավելությունն այն է, որ ես ապրում եմ երկրում, որտեղ կա մամուլի ազատություն։ Եւ հենց այդ ազատությունից էլ ծնվում է մեծ պատասխանատվությունը, արդար ու ազնիվ լինելու պատասխանատվությունը։ Կարող եմ մեկ բան ասել՝ առաջ գնացեք, մի գոհացեք պարզ պատասխաններով, փորձեք ճշմարտությունը պարզել, մի սահմանափակվեք միայն մամուլի ասուլիսներով։ Հենց դա է ինձ առաջ մղում»։ Ըստ նրա՝ շատ կարեւոր է հասկանալ՝ եթե դու ցանկանում ես ժողովրդավարություն, որտեղ մարդիկ իրավահավասար կլինեն, պետք է լինի ազատ մամուլ։ Համաձայն նրա՝ լրատվամիջոցների առաքելությունը հասարակությանն ավելի ուժեղ դարձնելն է։
Հիշեցնենք, որ Սթիվ Քյուրքչյանը The Boston Globe պարբերականի անդամներից մեկն էր, ովքեր հայտնել են կաթոլիկ եկեղեցում մանկապղծության դեպքերի մասին։ Այդ իրադարձությունների հիման վրա նկարահանվել է օսկարակիր «Spotlight» ֆիմը։
