Բանակում 7 տարի առաջ մահացած զինծառայող Արթուր Ղազարյանի մայրը օրերս հանդիպել է ՀՀ պաշտպանության նախարար Վիգեն Սարգսյանի հետ: NEWS.am-ի հետ զրույցում տիկին Իրինան նշեց, որ նախարարին ներկայացրել է իր որդու մահվան հանգամանքները եւ պահանջել բացահայտել որդու մահվան մեջ մեղավոր անձանց ու պատասխանատվության ենթարկել նրանց: Սակայն նախարար Վիգեն Սարգսյանը Իրինա Ղազարյանին ասել է, որ գործն իր իրավասության ներքո չէ եւ չի կարող օգնել նրան:
«Ինքն ասեց՝ ես իրավասու չեմ, ուրիշ ինչո՞վ կարամ Ձեզ օգնել: Մանրամասն ներկայացրել եմ իմ տղայի սպանության հանգամանքները, միայն ասում էր՝ ես իրավասու չեմ: Բայց իմ հետախույզ տղայի կյանքը խլել են։ Ինքն ինձ ոչ մի բանով չի կարա օգնի, քանի դեռ ժողովրդի գրպանից հանած 1000 դրամով է ուրիշներին օգնում»,-ասաց տիկին Իրինան:
Արթուր Ղազարյանի մոր հանդիպումը ՀՀ գլխավոր դատախազ Արթուր Դավթյանի հետ չի կայացել: NEWS.am-ի հետ զրույցում տիկին Իրինան նշեց, որ դատախազը նախապես օր եւ ժամ է նշանակել հանդիպման համար, սակայն դատախազությունում իրեն այլ մարդ է ընդունել:
«Խոստացել էին, որ դատախազ Արթուր Դավթյանը կընդունի, բայց չընդունեց: Ինչ-որ Գայանե Գասպարյան եկավ, բայց ես չցանկացա, որ ինքն ընդունի ինձ, նա ոչ մի բանի չի տիրապետում, պետք է կրկին ասեի, ներկայացնեի թե ինչ է տեղի ունեցել, դատախազը խոստացել էր, թող ընդուներ»,-ասաց նա:
Տիկին Իրինան նշեց, որ իր որդու՝ բանակում մահանալու հանգամանքները ամեն կերպով կոծկվում են եւ պատկան մարմինները հենց դրա համար է, որ ոչինչ չեն ձեռնարկում. «Դուրս է գալիս, որ ոչ մեկին ձեռք չի տալիս, որ որդուս սպանությունը բացահայտվի, իրանք միայն կոծկելու տերն են: Դատախազն ասել է՝ ժամանակ չունի, ժամ է նշանակել: Սեյրան Օհանյանն ասել է` պետական գաղտնիք է, ու էդպես շարունակում են նաեւ իրենք»:
Հիշեցնենք, որ ըստ քրեական գործի տվյալների, ժամկետային զինծառայող Արթուր Սմբատի Ղազարյանը, 2010թ. դեկտեմբերի 15-ին իրեն վատ է զգացել, շուրջ 36 ժամ անց կորցրել է գիտակցությունը, տեղափոխվել հոսպիտալ: 2010թ. դեկտեմբերի 17-ին վիրահատվել է, դեկտեմբերի 21-ին մահացել` այդպես էլ գիտակցության չգալով: Քրեական գործի վարույթը կարճվել է հանցագործության միջադեպի բացակայության պատճառաբանությամբ: