Ե՛վ ամերիկացիները, ե՛ւ Իսրայելը գաղտնի բանակցություններ են վարում Իրաքի եւ Սիրիայի քրդերի հետ: Հունիսի 12-ին լրագրողների հետ հանդիպմանն այս մասին հայտարարեց Հայաստանի ԳԱԱ արեւելագիտության իստիտուտի տնօրեն, թուրքագետ Ռուբեն Սաֆրաստյանը:
Դիտարկմանը, որ ԱՄՆ պետքարտուղարությունն ու Իրանը դեմ են արտահայտվել քրդական պետության ստեղծմանը, թուրքագետը պատասխանեց. «Այո, ե՛ւ պետքարտուղարությունը, ե՛ւ Իրանը հայտարարել են, որ դեմ են այդ գործընթացին, բայց պատմական փորձը հուշում է, որ քրդերի հետ կապված հարցերը գերտերությունների եւ տարածաշրջանի պետությունների հետաքրքրությունների կենտրոնում են: Այս դեպքում հայտարարություններն ու իրական գործողությունները շատ դեպքերում չեն համընկնում»:
Նրա խոսքով՝ հստակ հաշվարկ կա, եւ կարող են լինել հայտարարություններ, որոնք չեն համընկնի իրականության հետ: «Տվյալներ կան, որ ե՛ւ ամերիկացիները, ե՛ւ Իսրայելը գաղտնի բանակցություններ են վարում Իրաքի եւ Սիրիայի քրդերի հետ: Այսինքն՝ Մերձավոր Արեւելքում մեծ խաղ է ընթանում»,- հավելեց Ռուբեն Սաֆրաստյանը:
