Անհասկանալի է, որ դեռեւս չկա որեւէ արձագանք միջազգային գործընկերներից: Այս մասին Facebook-ի իր էջում գրել է Հայաստանի ԱԺ նախագահ Արա Բաբլոյանը՝ անդրադառնալով նախօրեին շփման գծում Ադրբեջանի զինուժի գործողությունների հետեւանքով երեք զինծառայողների զոհվելու փաստին: Նշենք, որ Արա Բաբլոյանն այժմ գտնվում է Արցախում, որտեղ մասնակցում է Հայկական քաղաքական կուսակցությունների ֆորումին:
Նա, մասնավորապես, գրել է.
«Արցախում եմ։ Ցավով տեղեկացա Արցախի սահմանին, ժամեր առաջ, ադրբեջանական զինված ուժերի կողմից հերթական լկտի սադրանքի հետեւանքով երեք երիտասարդների՝ Արայիկի, Վիգենի եւ Վարդանի զոհվելու մասին։ Բաքվի ռեժիմի իրականացրած այս գործողությունը որակում եմ որպես սպանություն։
Ցավակցում եմ զոհված տղաների հարազատներին, ընկերներին։ Վիշտը բոլորինս է… Տղաներն իրենց կյանքը տվեցին հայրենիքը պաշտպանելիս։ Հավերժ փառք մեր մարտիկներին…
Արցախյան հանդիպումների ընթացքում մշտապես խոսել ենք միասնականության մասին։ Որեւէ սադրանք չի կարող մեզ հետ պահել մեր նպատակներից։ Ադրբեջանի իշխանությունների կեցվածքը եւս մեկ անգամ ապացուցում է, որ մեծ գործ ունենք անելու՝ հետեւողականորեն համադրելով մեր ջանքերը։
Ադրբեջանական կողմն իմանալով, որ հերթական սադրանքն անպատիժ չի մնալու, պահի քաղաքական քմահաճույքը նորից ավելի բարձր դասեց մարդկային կյանքերից։
Հ.Գ. Անհասկանալի է, որ դեռեւս չկա որեւէ արձագանք միջազգային գործընկերներից»:
Ավելի վաղ NEWS.am-ը հայտնել էր, որ Արցախում հունիսի 16-ին, հակառակորդի կրակոցի հետեւանքով 3 զինծառայող է զոհվել: Հունիսի 16-ին՝ ժամը 18:05-ի սահմաններում, հակառակորդը հաստոցավոր հակատանկային նռնականետերից խախտել է հրադադարի պահպանման ռեժիմը ՊԲ կենտրոնական ենթակայության զորամասերից մեկի պահպանության տեղամասի ուղղությամբ, ինչի հետևանքով մահացու վիրավորումներ են ստացել ՊԲ զինծառայողներ Արայիկ Ռուդիկի Մատինյանը (ծնված 1997թ.), Վիգեն Ժիրայրի Պետրոսյանը (ծնված 1997թ.) և Վարդան Ծովակի Սարգսյանը (ծնված 1997թ.): Եվս երկու զինծառայող վիրավորվել է: