Ադրբեջանը փաստորեն վարկաբեկել է ԵԱՀԿ ՄԽ համանախագահների ձեւաչափը։ Այս մասին NEWS.am–ի թղթակցի հետ զրույցում ասել է ԱՊՀ երկրների ինստիտուտի Կովկասի բաժնի վարիչ, Հասարական- քաղաքական հետազոտությունների կենտրոնի տնօրեն, ռազմագետ Վլադիմիր Եվսեեւը։
Անդրադառնալով ղարաբաղյան հակամարտության գոտու շփման գծի վրա ադրբեջանական զորքերի կողմից հրադադարի ռեժիմի երեկվա խախտմանը՝ նա նշել է․ «Ադրբեջանական կողմի ներկա գործողությունները պայմանավորված են հետեւյալ հանգամանքով՝ նրանք համարում են, որ տարածքներ պոկելու քաղաքականությունը, որը նրանք իրականացրել են անցած տարվա ապրիլին, հաջող քաղաքականություն է։ Որքան մարդ էլ զոհվի՝ նրանց համար ամենագլխավորն այն է, որ տարածքների գոնե մի փոքր մասը վերադարձվի։ Երկրի ներսում չափից ուժեղ PR է իրականացվում՝ Իլհամ Ալիեւի ու նրա կնոջ՝ Մեհրիբանի անձնական իշխանության ամրապնդման նպատակով։
Վլադիմիր Եվսեեւը չի կարծում, որ ԵԱՀԿ ՄԽ համանախագահների հայտարարությունները Ադրբեջանի համար մեծ նշանակություն ունեն։ «Եթե դրանք նշանակություն ունենային, Ադրբեջանը կկատարեր այն որոշումները, որոնք ընդունվել են ԵԱՀԿ ՄԽ շրջանակում, մասնավորապես, հակամարտության գոտում դիտորդական առաքելության ավելացման ու միջադեպերի հետաքննման միջազգային մեխանիզմների մշակման ուղղությամբ։ Դրա համար է լ ես կարող եմ ենթադրել, որ ամենայն հավանականությամբ, դա կապակցված չէ համանախագահների վերջին հասցեական հայտարարությունների հետ, այլ ավելի շատ ներադրբեջանական պատճառներով է պայմանավորված»,- պարզաբանել է նա։
Այն հարցին, արդյոք ԵԱՀԿ ՄԽ համանախագահ -երկրների կողմից որեւէ գործուն քայլեր կհաջորդեն՝ ռազմագետը շեշտեց․ «Ես կարծում եմ, որ համանախագահ երկրների՝ առաջին հերթին Ռուսաստանի ու ԱՄՆ-ի դիրքորոշումները Ադրբեջանի հանդեպ կխստանան, քանի որ նա չի կատարում ԵԱՀԿ ՄԽ մակարդակի վրա ընդունված որոշումները։ Դա Մոսկվային ու Վաշինգտոնին կստիպի ուժեղացնել ճնշումը Բաքվի վրա, որպեսզի նա կատարի ավելի վաղ ընդունված որոշումները»։
Հիշեցնենք, որ նախօրեին հակառակորդը հաստոցավոր հակատանկային նռնականետերից խախտել է հրադադարի պահպանման ռեժիմը ՊԲ կենտրոնական ենթակայության զորամասերից մեկի պահպանության տեղամասի ուղղությամբ, ինչի հետեւանքով մահացու վիրավորումներ են ստացել ՊԲ զինծառայողներ Արայիկ Ռուդիկի Մատինյանը (ծնված 1997թ.), Վիգեն Ժիրայրի Պետրոսյանը (ծնված 1997թ.) եւ Վարդան Ծովակի Սարգսյանը (ծնված 1997թ.):
Իսկ այսօր առավոտյան ադրբեջանական կողմը հյուսիսային ուղղությամբ դիմել է հերթական սադրանքի, որի հետեւանքով ժամը 09.40-ի սահմաններում մահացու հրազենային վիրավորում է ստացել ՊԲ զինծառայող, 1997թ. ծնված Նարեկ Տիգրանի Գասպարյանը: