Հանքանյութի եւ կապարի առնվազն զանգվածին 45 տոկոս պարունակությամբ խտանյութի համար, որը ԵՏՄ արտաքին տնտեսական գործունեության ապրանքային անվանացանկում որակավորվում է 2607 00 000 1 ծածկագրով, ներմուծման մաքսատուրքի զրոյական դրույքը 2 տարով երկարացնելու որոշումն ընդունվել է Եվրասիական տնտեսական հանձնաժողովի նիստում, հայտնում են ԵՏՀ մամուլի ծառայությունից:

Հարցի քննարկումը նախաձեռնել էր Ղազախստանը: Որոշման ընդունման օգտին էին ԵՏՄ երկրներում կապարի մեծ պարունակությամբ նշված տեսակի հումքի արտադրության անբավարար ծավալները: Փորձագետների կարծիքով` հանքանյութի եւ կապարի բաժնի փոքր ցուցանիշներով խտանյութի օգտագործումը հանգեցնում է սարքավերման երկարատեւության նվազման, տեխնոլոգիական ծախսերի մեծացման եւ արտադրական գործընթացի բարդացման ու ծախսերի աճի:

ԵՏՀ նախարարները հատուկ ուշադրություն են դարձրել, որ հանքանյութի եւ առնվազն զանգվածին 45 տոկոս կապար պարունակող խտանյութի 95 տոկոսը, որոնք բերվում են երրորդ երկրներից, ԵՏՄ են ներմուծվում Տաջիկստանից, որը մտնում է ԱՊՀ երկրների ազատ առեւտրի գոտու մեջ: Այսպիսով, Տաջիկստանից ստացվող հումքի համար ներկայումս կիրառվում է զրոյական մաքսատուրք: 2016 թվականին մատակարարումների ընդհանուր ծավալը կազմել է 93,038 տոննա` ընդհանուր 101,649,000 դոլար գումարով:

Այս որոշումն ընդունվել է 2017-ից 2019 թվականների համար եւ ուժի մեջ կմտնի հրապարակվելուց հետո 30 օրը լրանալու ընթացքում: