«Սասնա ծռեր» խմբի 14 անդամների գործով դատական նիստին, այսօր՝ հունիսի 21-ին, դատավոր Արտուշ Գաբրիելյանը դատական սանկցիա կիրառեց ամբաստանյալ Գագիկ Եղիազարյանի պաշտպան Տիգրան Եգորյանի նկատմամբ:
Երեւանի Ավան եւ Նոր Նորք վարչական շրջանների ընդհանուր իրավասության դատարանում ընթացող արտագնա նիստի ժամանակ մինչ այդ դատարանը դատական սանկցիա էր կիրառել Եղիազարյանի նկատմամբ եւ հայտարարել ընդմիջում: Ընդմիջման ժամանակ Եգորյանը հեռացել էր դատարանից՝ գրություն ուղարկելով դատարանին, որ վերջինիս գործողություններն անօրինական էր: Խորհրդակցական սենյակից վերադառնալով դատարանը սանկցիա կիրառեց Եգորյանի նկատմամբ՝ պատճառաբանելով, որ անհարգալից վերաբերմունք է դրսեւորել դատարանի հանդեպ:
Դրանից հետո փաստաբան Ինեսա Պետրոսյանը հայտարարեց, որ նիստը չի կարող այս պայմաններում շարունակվել, քանի որ ամբաստանյալ Սմբատ Բարսեղյանի պաշտպան Հայկ Ալումյանը ներկա չէ: Դատավոր Արտուշ Գաբրիելյանի պատճառաբանությունը, թե սա նախապատրաստական փուլն է, իսկ Հայկ Ալումյանն էլ դեռ չի ներգրավվել որպես պաշտպան, բարկացրեց ներկա փաստաբաններին: Ինեսա Պետրոսյանը հայտարարեց, որ իրենք նիստերի դահլիճ մտնելիս ներկայանում են որպես այս կամ այն մեղադրյալի պաշտպան:
Հարցի քննարկման ժամանակ ամբաստանյալ Վարուժան Ավետիսյանը զինված ապստամբության կոչ արեց: Արտուշ Գաբրիելյանը դատական սանկցիա կիրառեց նրա նկատմամբ եւ հայտարարեց ընդմիջում:
Դատական նիստը կվերսկսվի ժամը 17:00-ին: Ի դեպ, սա արդեն 4-րդ ընդմիջումն է այսօրվա ընթացքում:
Այս գործը քննվում է Էրեբունի եւ Նուբարաշեն վարչական շրջանների ընդհանուր իրավասության դատարանի կողմից, սակայն նիստերն արտագնա են անցկացվում, քանի որ այնտեղ դահլիճը փոքր է:
Ըստ մեղադրական եզրակացության՝ 2016թ. հուլիսի 17-ին ժամը 05:00-ի սահմաններում կազմակերպված խմբի անդամները զինված հարձակում են գործել ոստիկանության Երեւանի վարչության պարեկապահակետային ծառայության գնդի վարչական շենքերի վրա՝ Խաչատուր Գիչյանի տրամադրած «ԿՌԱԶ-256 Բ1» մակնիշի բեռնատարով հարվածելով կոտրել են գնդի վարչական տարածքի մուտքի գլխավոր դարպասներն ու քանդել կից պարիսպի մի հատվածը, իրենց մոտ ապօրինի պահվող հրազենի գործադրմամբ, ներխուժել են գնդի տարածք, զավթել եւ պահել են գնդի վարչական շենքերը, շինություններն ու տարածքում գտնվող տրանսպորտի միջոցները, ինչպես նաեւ նույն եղանակով պատանդ են վերցրել ոստիկանության աշխատակիցների:
Հարձակման ընթացքում կազմակերպված խմբի անդամներից Սմբատ Բարսեղյանն ինքնաձիգից արձակված կրակոցով, պատանդ վերցնելով զուգորդված, դիտավորությամբ ապօրինաբար կյանքից զրկել է ՊՊԾ գնդի հրամանատարի տեղակալ, պատասխանատու հերթապահ, ոստիկանության գնդապետ Արթուր Վանոյանին, իսկ նույն հանգամանքներում Արմեն Բիլյանը՝ գնդի հերթապահի օգնական, ոստիկանության ավագ ենթասպա Գագիկ Մկրտչյանին:
Արմեն Բիլյանը կազմակերպված խմբի այլ անդամների հետ գույքի գաղտնի հափշտակություն կատարելու դիտավորությամբ, 2016 թվականի հուլիսի 23-ից 27-ն ընկած ժամանակահատվածում, գնդի տարածքում գտնվող գեներատորի գործարկմամբ, էլեկտրական սղոցով կտրել են ՊՊԾ գնդի պարսպի մեջ ներկառուցված «Ակբա-Կրեդիտ Ագրիկոլ Բանկ» ՓԲ ընկերության բանկոմատի հետնամասի դռների ծխնիները, բացել բանկոմատը եւ այնտեղից գաղտնի հափշտակել 14 մլն 808 հազար դրամը:
2016 թվականի հուլիսի 30-ին՝ ժամը 18-ի սահմաններում, Սմբատ Բարսեղյանն օպտիկական նշանառության սարքով «ՍԿՍ» տեսակի ակոսափող հրազենից արձակված կրակոցով դիտավորությամբ ապօրինաբար կյանքից զրկել է ոստիկանության զորքերի զորամասի զինծառայող, ոստիկանության ենթասպա Յուրի Տեփանոսյանին:
Նախաքննությամբ հաստատվել է նաեւ, որ Խաչատուր Գիչյանը օժանդակել է շենքեր, շինություններ եւ տրանսպորտի միջոցներ զավթելուն, իսկ Կարո Եղնուկյանը՝ զավթածն ու պատանդներին պահելուն:
