Թուրք հայտնի լրագրող Ահմեդ Ալթանը դատարանում հայտարարել է, թե ինքն ու իր եղբայրը ձերբակալված են Էրդողանին քննադատելու համար։
Թուրքական T24 կայքի փոխանցմամբ՝ Ստամբուլի ծանր հանցագործությունների գործերով 26–րդ դատարանում տեղի ունեցած նիստի ժամանակ Ահմեդ Ալթանը հանդես է եկել պաշտպանական ճառով, որի ընթացքում շեշտել է, որ իր ու իր եղբոր ձերբակալությունն ու կալանքը քաղաքական հողի վրա է։ Նա ծիծաղելի է համարել իրեն դատել հեղաշրջման փորձի գործով միայն այն պատճառով, որ ինքը ճանաչել է հեղաշրջման փորձի մեջ մեղադրվողներին։
«Ինչպե՞ս կարող է մեկին ճանաչելը հանցանք համարվել։ Այդ դեպքում բոլոր բանտ այցելողներին պետք է դատապարտեն»,–ասել է Ահմեդ Ալթանը՝ իրեն ուղղված մեղադրական եզրակացությունը որպես իրավական պոռնո անվանելով։
Նշենք, որ Taraf պարբերականի նախկին գլխավոր խմբագիր Ահմեդ Ալթանը ճանաչել է Հայոց ցեղասպանությունը եւ իր հրապարակումներում բազմիցս կոչ արել Թուրքիային ճանաչել Հայոց ցեղասպանությունը։
