Ղարաբաղյան հակամարտության շփման գծում լարվածությունը ցանկացած պահի կարող է էսկալացիայի հանգեցնել: Այս մասին NEWS.am-ի հետ զրույցում ասաց նախկին ընդդիմադիր պատգամավոր, Մարդկային զարգացման միջազգային կենտրոնի տնօրեն Թեւան Պողոսյանը:
Փորձագետի խոսքով` այն պահին, երբ կողմերը սկսում են միմյանց վրա կրակել, ոչ մի երաշխիք չկա, որ հրաձգությունը կդադարեցվի: «Հրաձգության դադարեցման միակ երաշխիքն այն է, երբ հակառակորդը սկսի գիտակցել, որ դու շատ ավելի ուժեղ ես»,- նշեց նախկին պատգամավորը` հավելելով, որ տվյալ մոտեցման ճիշտ լինելն ապացուցվել է 2016-ի ապրիլյան էսկալացիայի ժամանակ:
Փորձագետն ընդգծեց, որ ադրբեջանական կողմը պետք է նախապես հասկանա, որ իրենց կողմից յուրաքանչյուր կրակոցին կարող է համաչափ պատասխան հետեւել: «Հայերի նկատմամբ Ադրբեջանում քարոզվող ատելության բորբոքման քաղաքականությունը ավելի կսաստկանա, եւ այդ դեպքում ոչ մի կառավարություն չի կարողանա այն վերահսկել: Երբ մարդն ատելությամբ է ապրում, ապա դա արդեն նորմալ մարդ չէ: Իսկ երբ նրանք մեծաթի՞վ են: Ասենք` 7 միլիո՞ն»,- հավելեց Թեւան Պողոսյանը: