Այս տարվա օգոստոսից Գյումրիում արդեն հասանելի կլինի երկրաբանական տեղեկատվական համակարգը, իսկ տարեվերջին` նաեւ Վանաձորում: Այս մասին հունիսի 29-ին` կառավարության հերթական նիստում հայտարարեց վարչապետ Կարեն Կարապետյանը:
Նրա խոսքով` 2016 թվականին նախաձեռնվեց տարբեր ոլորտներում ճյուղային երկրաբանական տեղեկատվական համակարգերի ներդրման ծրագրի իրականացումը: Համակարգն արդեն ներդրված է Երեւանում: Կարապետյանը համապատասխան մարմինների ղեկավարներին հանձնարարեց եռամսյա ժամկետում ուսումնասիրել եւ Հայաստանի Անշարժ գույքի կադաստրի պետական կոմիտե ներկայացնել գոյություն ունեցող թվային քարտեզագրման նյութերի մասին տեղեկությունները: Վարչապետը տարածքային կառավարման եւ զարգացման նախարար Դավիթ Լոքյանին նաեւ հանձնարարեց ապահովել համայնքների կողմից տեղեկությունների հավաքումը: Էներգետիկ ենթակառուցվածքների եւ բնական պաշարների ու տրանսպորտի, կապի եւ տեղեկատվական տեխնոլոգիաների նախարարներ Աշոտ Մանուկյանին եւ Վահան Մարտիրոսյանին վարչապետը հանձնարարեց մեկամսյա ժամկետում Անշարժ գույքի կադաստրի պետական կոմիտե նյութեր ներկայացնել իրենց սեփականության ներքո գտնվող կամ շահագործման տրված ենթակառուցվածքների մասին:
Վարչապետը Հայաստանի Անշարժ գույքի կադաստրի պետական կոմիտեի նախագահ Մարտին Սարգսյանին հանձնարարեց նշված տվյալները ստանալու դեպքում 10-օրյա ժամկետում կառավարության աշխատակազմ ներկայացնել համապատասխան առաջարկներ: «Մենք շահագրգռված ենք, որպեսզի օգտատերերն առաջարկներ ներկայացնեն, թե այս համակարգերում ինչն է պետք բարելավել: Այսօր Երեւանում ֆիզիկական կամ իրավաբանական անձը միանալու դեպքում կարող է այս համակարգից օգտվել եւ հասկանալ, թե տվյալ հասցեով էլեկտրաէներգիա, գազ, ջուր ստանալու ինչ հնարավորություն ունի»,- ամփոփեց Կարեն Կարապետյանը: