Այս պահին Հայաստանը չի կարող ատոմային էներգետիկան փախարինել էլեկտրաէներգիայի ստացման այլընտրանքային մեթոդներով։ Այս մասին հուլիսի 3-ին՝ լրագրողների հետ հանդիպման ժամանակ ասաց տնտեսագետ Կառլեն Խաչատրյանը։
Նրա խոսքով՝ սա պայմանավորված է այն հանգամանքով, որ ատոմային էներգետիկան ապահովում է երկրում ամբողջ էլեկտրաէներգիայի 40 տոկոսը, եւ դրանից գործնականում անհնար է կտրուկ հրաժարվել։ «Սակայն կարելի է դրան հասնել աստիճանաբար, քայլ առ քայլ։ Եթե հաշվի առնենք վերջին տարիների միտումները, ինձ թվում է, որ 10 տարի հետո Հայաստանի էներգետիկ համակարգում այլընտրանքային էլեկտրաէներգիայի բաժինը ավելի ծանրակշիռ կլինի»,- հավելեց տնտեսագետը՝ միաժամանակ նշելով, որ այս հարցում միայն պետության դերը բավական չէ։
Խաչատրյանը կարծում է, որ էներգետիկ ապահովման այլընտրանքային մեթոդներին անցման ծրագրերի իրականացման դեպքում Հայաստանում ատոմային էներգետիկայի բաժինը կնվազի 40 տոկոսից մինչեւ 20 տոկոս։