Ադրբեջանի պաշտոնական, հավասարապես նաեւ ոչ պաշտոնական կառույցները վաղուց առաջնորդվում են խեղաթյուրման, կեղծման, փաստերի եւ հայտարարությունների աղավաղման մեթոդով: Նրանցից ետ չեն մնում նաեւ ադրբեջանական լրատվամիջոցները` տարբեր գերատեսչությունների փոխանցմամբ ակտիվորեն ապատեղեկատվություն տարածելով:
Այս անգամ, սակայն, ադրբեջանական մամուլի ներկայացուցիչները չափից ավելի հեռու են գնացել` փորձելով բացահայտ ապատեղեկատվությունը որպես «փաստեր» ներկայացնել:
Հիշեցնենք, որ հուլիսի 4-ի երեկոյան ադրբեջանական կողմը հերթական սադրանքին է դիմել` գնդակոծելով Լեռնային Ղարաբաղի Պաշտպանական բանակի դիրքերը, այդ թվում` թուրքական արտադրության հրթիռային կայանքներից: Հակառակորդի ակտիվությունը ճնշելու համար ղարաբաղյան կողմը ստիպված էր պատասխան միջոցառումներ ձեռնարկել: Փոխհրաձգության ընթացքում զոհվել են ադրբեջանական Ալխանլու գյուղի 2 բնակիչներ` 2-ամյա երեխա եւ տատիկ: Դեռեւս հարցական է` ողբերգական պատահարը ղարաբաղյան կողմից արկի ընկնելու հետեւանք էր, թե Ադրբեջանի ԶՈւ-ն ինքն է սեփական գյուղը գնդակոծել Լեռնային Ղարաբաղին մեղադրելու համար:
Ղարաբաղյան կողմը նախկինում եւս բազմիցս հայտարարել է, որ սադրանքների ամբողջ պատասխանատվությունը Ադրբեջանի իշխանություններն են կրում: Առավել եւս, որ Ադրբեջանում ռազմական ղեկավարությունը ռազմական օբյեկտները տեղակայում է գյուղերի տարածքներում կամ դրանց անմիջական մեձակայքում` քաղաքացիական բնակչությանը որպես կենդանի վահան օգտագործելով: Միեւնույն ժամանակ, բանակը թույլ չի տալիս բնակչությանը գյուղերից հեռանալ` նրանց ավելի վատ դրության մեջ դնելով:
Հուլիսի 4-ի իրադարձություններից հետո ադրբեջանական կողմն իրեն հատուկ հիստերիկ հնչերանգով փորձեց բոլոր հայտարարությունները որպես Հայաստանին ուղղված ուղղակի մեղադրանք ներկայացնել: Գայթակղվելով` ադրբեջանական լրատվամիջոցները մտացածին հաղորդագրություններ տարածեցին:
Վկայակոչելով Ադրբեջանի ԱԳՆ ներկայացուցչին` լրատվամիջոցները նախ հայտնեցին,որ ԵԱՀԿ գործող նախագահի անձնական ներկայացուցիչ Անջեյ Կասպրշիկը «հետաքննություն է սկսում», այնուհետեւ հայտնեցին, որ դեսպան Կասպրշիկը «այցելել է 2-ամյա Զահրայի եւ նրա տատիկի զոհվելու վայրը»:
NEWS.am-ը պաշտոնական հարցմամբ ԵԱՀԿ քարտուղարություն դիմեց` հարցնելով, թե արդյոք իրականությանը համապատասխանո՞ւմ են այդ տեղեկությունները: Կասպրշիկի վարչության պաշտոնական պատասխանում հաղորդվում է, որ «Ադրբեջանական կողմի խնդրանքով եւ հետեւելով դեսպան Կասպրշիկի ցուցումներին, որը Վիեննայում է Մինսկի խմբին տեղեկացնելու նպատակով, հուլիսի 5-ին գյուղ է մեկնել գործող նախագահի անձնական ներկայացուցչի գրասենյակի մեկ դաշտային օգնական, միեւնույն ժամանակ մյուս օգնականը միջադեպի հետեւանքով տուժած հակառակ կողմ է ուղեւորվել, շփման գծի հատված: Գրասենյակը հետաքննություն կատարելու մանդատ չունի, սակայն 2 դաշտային օգնականները կարողացել են իրավիճակին տեղում ծանոթանալ»:
Պատասխանից ակնհայտ է, որ դեսպան Կասպրշիկը Ալխանու գյուղ չի այցելել, ինչպես փորձում են ներկայացնել ադրբեջանական լրատվամիջոցները: Ավելին` գործող նախագահի անձնական ներկայացուցիչը հետաքննություն չի սկսել, ինչպես պնդել է Ադրբեջանի ԱԳՆ ներկայացուցիչը: Ի գիտություն Հիքմեթ Հաջիեւի` հենց ադրբեջանական կողմն է հրաժարվում միջադեպերի հետաքննության մեխանիզմների ներդրումից: Ի տարբերություն Բաքվի` Երեւանը եւ ԵԱՀԿ Մինսկի խմբի համանախագահները պնդում են համապատասխան մեխանիզմների ներդրման հարցը: Այս եւ սրան նման միջադեպերը, իսկ ավելի շատ ադրբեջանական կողմի արձագանքը, որը ողբերգությունից չի խորշում հանուն հակահայկական հիստերիայի խորացման, ակներեւորեն ցույց են տալիս, որ միջադեպերը հրահրողին ձեռնտու է գոյություն ունեցող իրավիճակը:
