Ղարաբաղյան հակամարտության գոտում շփման գծի իրավիճակը կարող է լարվել, քանի որ հակառակորդը որպես կենդանի վահան է արդեն օգտագործում երեխաներին եւ կանանց: Այս մասին հուլիսի 8-ին` լրագրողների հետ հանդիպման ժամանակ հայտարարեց «Հայդուկ» ջոկատի շտաբի պետ, գնդապետ, Արցախյան պատերազմի մասնակից Վիտյա Հակոբյանը:
Նրա խոսքով` նրանք թաքնվում են երեխաների, կանանց, խաղաղ բնակչության թիկունքում: «Եթե Ադրբեջանը կարծում է, որ այս պատճառով մենք չպետք է կրակենք եւ կրակետը ոչնչացնենք, ապա մեծապես սխալվում է: Մենք մշտապես պետք է զգոն լինենք, քանի որ գործ ունենք անկանխատեսելի եւ վախկոտ հակառակորդի հետ: Մեր բանակն իր պարտականությունները հրաշալի է կատարում: Մենք մշտապես պետք է ամրապնդենք մեր բանակը»,- նշեց Վիտյա Հակոբյանը:
Գնդապետն այնուհետեւ շարունակեց, որ «ազգ բանակ» հասկացությունը պետք է բարձր մակարդակով իրականացվի: «Մենք չենք կարող հայրենիքին դավաճանել, մենք չենք կարող հողը դավաճանել, սակայն պետք է հիշենք, որ հողեր կան, որոնք պետք է ազատագրել»,- ընդգծեց Վիտյա Հակոբյանը:
Դիմելով Ադրբեջանի պաշտպանության նախարար Զաքիր Հասանովին` նա խորհուրդ տվեց խելք հավաքել եւ հասկանալ, որ հայերն իրենցից ոչ մի բան չեն նվաճել: «Մենք մեր հողերն ենք ազատագրել: Նրանք դա ցանկանում են, թե ոչ, պետք է այս մտքի հետ հաշտվեն»,- ամփոփեց Հակոբյանը:
