ՌԴ Պետական դուման ուրբաթ կքննարկի Հայաստանի հետ 2016 թվականի նոյեմբերի 30-ին ստորագրված զորքերի միավորված խմբավորման մասին համաձայնագրի վավերացման օրինագիծը, փոխանցում է «ՌԻԱ Նովոստի»-ն:
Համաձայնագիրը եւ կից հավելվածը որոշում են ՌԴ-ի եւ Հայաստանի զորքերի միավորված խմբավորման դերը, կազմավորման, տեղակայման եւ կիրառման կարգը: Նշվում է, որ միավորված խմբավորումը նախատեսված է Հավաքական անվտանգության կովկասյան տարածաշրջանում ռազմական անվտանգության ապահովման համար:
«Միավորված խմբավորումը կազմում են կողմերի զինված ուժերի կառավարման մարմինները եւ զորքերը (ուժերը), ինչպես նաեւ այլ զորքեր, ռազմական կազմավորումներ եւ կողմերի մարմինները, որոնք տարածաշրջանում տեղակայվում են անմիջական ագրեսիայի սպառնալիքի կամ պատերազմական ժամանակաշրջանում` հնարավոր ագրեսիան ետ մղելու համար, եւ ծրագրված են ընդհանուր հրամանատարության ներքո կիրառելու համար` ըստ միասնական մտահղացման եւ ծրագրի»,- նշված է պարզաբանման մեջ: Համաձայնագրի իրականացման իրավասու մարմիններն են ՌԴ եւ ՀՀ պաշտպանության նախարարությունները, որոնք միավորված խմբավորման կազմը որոշում են ռազմաքաղական իրադրության հիման վրա եւ հաշվի առնելով պոտենցիալ սպառնալիքների ուղղությունները:
Սահմանվում է, որ միավորված խմբավորման կիրառման ծրագրումը խաղաղ ժամանակ կատարվում է կողմերի ԶՈւ գլխավոր շտաբների համատեղ հրահանգների հիման վրա: «Կիրառման ծրագիրը մշակվում է հրամանատարության եւ օպերատիվ խմբի կողմից, որն առանձնացվում է Հայաստանի տարածքում տեղակայված ռուսական ռազմաբազայի կազմից, որը հաստատում են կողմերի ԶՈւ գլխավոր շտաբների պետերը»,- նշված է օրինագծի պարզաբանման մեջ:
Միավորված խմբավորման հիմնական խնդիրներին են վերաբերում ՌԴ եւ Հայաստանի դեմ զինված հարձակման (ագրեսիայի) անմիջական նախապատրաստման բացահայտումը եւ դրա ետ մղումը, երկու երկրների պետական սահմանի ցամաքի հատվածի պաշտպանությունը` պատասխանատվության հաստատված սահմաններում, օդատիեզերական տարածքում ՌԴ եւ ՀՀ պետական սահմանների պաշտպանությանը մասնակցությունը, ինչպես նաեւ երկու երկրների զորքերի եւ տարածաշրջանում տեղակայված առանձնապես կարեւոր օբյեկտների հակաօդային պաշտպանությանը մասնակցությունը:
Միավորված խմբավորման կառավարման համար ստեղծվում է միավորված հրամանատարություն: Միավորված խմբավորման տեղակայման եւ կիրառման որոշումն ընդունվում է ՌԴ եւ ՀՀ ԶՈւ-երի գերագույն հրամանատարների հետ համատեղ: Սահմանվում է, որ պայմանագիրը կնքված է 5 տարի ժամկետով` հետագա 5 տարիներին ավտոմատ երկարացնելու հնարավորությամբ: «Համաձայնագրի իրականացումը լիովին համապատասխանում է ՌԴ շահերին, կնպաստի երկու պետությունների անվտանգության ամրապնդմանը եւ դաշնային բյուջեից լրացուցիչ հատկացումներ չի պահանջի»,- նշված է կից փաստաթղթերում:
