Եթե Հայաստանն իրավական պետություն լիներ, «Սասնա ծռերի» «ապստամբությունը» չէր լինի: Այս մասին հուլիսի 18-ին հայտարարեց Հայաստանի Հելսինկյան կոմիտեի նախագահ Ավետիք Իշխանյանը՝ ելույթ ունենալով «Համակարգային անպատժելիությունը որպես քրեական արդարադատության մարտահրավեր» թեմայով հասարակական քննարկման ընթացքում, որը կազմակերպել է «Բաց հասարակության հիմնադրամներ-Հայաստան» կազմակերպությունը:
Նրա խոսքով՝ 2013 թվականից սկսած Հայաստանում անընդհատ քաղբանտարկյալներ կան, որը կապված է երկրի քաղաքական ճգնաժամի հետ: Ըստ իրավապաշտպանի՝ Շանթ Հարությունյանի եւ նրա համախոհների դեպքում քաղաքակիրթ երկրներում կարող էին վարչական պատասխանատվության ենթարկել, այլ ոչ թե 8 տարվա ազատազրկման: «Մարդկանց ծեծել դատարանի դահլիճո՞ւմ: Ես տեղյակ չեմ՝ համաշխարհային պատմության մեջ նման բան եղե՞լ է, թե՞ ոչ»,- հավելեց Իշխանյանը
Հիշեցնենք, որ հունիսի 28-ին դատական նիստի ժամանակ ոստիկաններից մեկը ամբաստանյալներից Արեգ Կյուրեղյանին թույլ չի տվել փաստաբանին գրություն փոխանցել: Դրան հետեւել է ամբաստանյալի եւ ոստիկանի միջեւ սկսված վեճը, ոստիկանները դատարանի դահլիճից դուրս են բերել Արեգ Կյուրեղյանին, Մխիթար Ավետիսյանին եւ Սմբատ Բարսեղյանին: Ավելի ուշ Կյուրեղյանի եւ Ավետիսյանի, նաեւ 2 այլ ամբաստանյալների՝ Արայիկ Խանդոյանի եւ Գագիկ Եղիազարյանի փաստաբանները հայտարարել են, որ ոստիկանները դատարանի նկուղում ծեծել են իրենց պաշտպանյալներին: Human Rights Watch միջազգային իրավապաշտպան կազմակերպությունը նշել է, որ հունիսի 29-ին ՀՀ օմբուդսմենի ներկայացուցիչներն այցելել են Մխիթար Ավետիսյանին, Արայիկ Խանդոյանին եւ Գագիկ Եղիազարյանին ու գրանցել են, որ նրանց մարմիններին վնասվածքներ են եղել, որոնք համապատասխանում են ծեծելու մասին նրանց պնդումներին:
