Ռուսաստանի նախագահ Վլադիմիր Պուտինը մինչեւ 2018 թվականը Եվրասիական տնտեսական միությունում բնական մորթուց ապրանքների մակնշման նախագծի իրականացման ժամկետը երկարաձգելու մասին օրենք է ստորագրել։ Համապատասխան փաստաթուղթը հրապարակվել է իրավաբանական տեղեկատվության պաշտոնական կայքում, փոխանցում է «ՌԻԱ Նովոստի»-ն։
2015-2016 թվականների փորձնական ծրագրի համաձայնագրի իրականացման համաձայն՝ մակնշման ենթակա են բնական մորթուց հագուստները եւ հագուստի պարագաներն ու այլ իրերը։ Նշվում է, որ նման ապրանքների շրջանառությունը փորձնական ծրագրի անդամ երկրներում առանց մակնշման արգելվում է (Հայաստան, Բելառուս, Ղազախստան, Ղրղզստան, ՌԴ)։
Համաձայնագրի իրագործման հիմնական նպատակն է փորձնական ծրագրի անդամ երկրների տարածքում կեղծված եւ անորակ արտադրանքի տարածումը կանխելը, ինչպես նաեւ ապրանքների առանձին խմբի շրջանառության նկատմամբ պետական վերահսկողության արդյունավետությունը բարձրացնելը։
ԵՏՄ անդամ երկրները համաձայնել են համաձայնագրի ժամկետը 2017 թվականի հունվարի 1-ից երկարաձգել մինչեւ 2018 թվականի դեկտեմբերի 31-ը։