Թուրքիայի նախագահ Թայիփ Էրդողանը Գերմանիային առաջարկել էր Թուրքիայում կալանքի մեջ գտնվող գերմանացի լրագրող Դենիզ Յուջելին փոխանակել 2 թուրք նախկին գեներալների հետ, որոնք Գերմանիայում ապաստան էին խնդրել անցյալ տարվա հեղաշրջման փորձից հետո, հինգշաբթի հայտնել է Bild տաբլոիդը՝ վկայակոչելով դիվանագիտական աղբյուրներին:
Փետրվարին Ստամբուլում կալանավորվել էր թուրքական ծագմամբ գերմանացի լրագրող Դենիզ Յուջելը, որը հանգեցրել է Բեռլինի եւ Անկարայի հարաբերությունների լարվածությանը: Մերկելն Անկարայից պահանջել էր Յուջելին ազատել եւ պահպանել լրատվամիջոցների ազատությունը, Էրդողանն ի պատասխան հայտարարել էր, թե զարմանք է հարուցում լրագրողի աջակցությամբ հանդես գալու կանցլերի փորձը, որն ահաբեկչության մեջ է մեղադրվում:
Պարբերականի տեղեկություններով՝ Էրդողանը մի քանի շաբաթ առաջ է հանդես եկել գերմանացի լրագրողին նախկին գեներալների հետ փոխանակելու առաջարկով: «Մենք, իհարկե, չենք կարող նման գործարքի գնալ»,- պարբերականին ասել է Գերմանիայի ԱԳՆ ներկայացուցիչը:
Հիշեցնենք, որ մի խումբ խռովարարներ 2016 թվականի հուլիսի 15-ի լույս 16-ի գիշերը ռազմական հեղաշրջման փորձ էին ձեռնարկել: Հիմնական դիմակայությունը ծավալվել էր Անկարայում եւ Ստամբուլում: Զոհվել է ավելի քան 240 թուրք քաղաքացի, ավելի քան 2 հազար մարդ վնասվածքներ է ստացել, խռովությունը ճնշվել է: Խռովությունից հետո Թուրքիայում կալանավորվել է ավելի քան 50 հազար մարդ, աշխատանքից ազատվել կամ հեռացվել են 140 հազար պետական ծառայողներ: