Հայաստանը պարտադիր պետք է ստորագրի այդ համաձայնագիրը, բայց պարտադիր չի մասնակցել։ Այս մասին, այսօր՝ հուլիսի 20-ին, կառավարության նիստից հետո լրագրողների հետ զրույցում նշել է ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը՝ անդրադառնալով ՀՀ կառավարության կողմից այսօր հավանության արժանացած «Տիեզերագնացներին փրկելու, տիեզերագնացների վերադարձի և տիեզերական տարածություն արձակված օբյեկտների վերադարձի մասին» համաձայնագիրը վավերացնելու մասին» ՀՀ օրենքի նախագծին։
Նրա խոսքով, այդ համաձայնագրով, Հայաստանը պարտավորվում է տիեզերքը խաղաղ օգտագործել, «չզավթել լուսինը»:
Կատակ-հարցին՝ հնարավո՞ր է մի օր լուսինը զավթե՞նք, Վ.Մարտիրոսյանը հումորով պատասխանեց. «Ի՞նչ իմանամ, կարող է` օրը գա, հնարավորություն ունենանք… լուսին մեկնելու»:
Հարցին, թե մի ժամանակ արբանյակ ունենալու ծրագիր կար, հիմա ի՞նչ փուլում է, նախարարը պատասխանեց, որ համագործակցությունը շարունակվում է «Ռոսկոսմոսի», չինական ու եվրոպական ընկերությունների հետ. «Տեսնենք, համատեղ արբանյակ ունենալու բանակցություններն ընթացքի մեջ են, դա մեծ ծրագիր է, որը պահանջում է մեծ ֆինանսավորում: Դա թույլ կտա ծառայություն մատուցել եւ կապի ոլորտում, եւ ունենանք մեր պաշտպանական խնդիրները»: