Լեռնային Ղարաբաղի Հանրապետությունում նախագահ Բակո Սահակյանի վերընտրությունը անսպասելի չէր: Այս մասին հուլիսի 21-ին՝ լրագրողների հետ հանդիպման ժամանակ ասաց Կովկաս ինստիտուտի տնօրեն, քաղաքագետ Ալեքսանդր Իսկանդարյանը:
«Ամբողջ հարգանքով հանդերձ, համարձակվում եմ ասել, որ Բակո Սահակյանը լուրջ մրցակիցներ չուներ: Եվ ընդհանրապես ընտրությունների արդյունքները միանգամայն կանխատեսելի էին»,- պարզաբանեց քաղաքագետը: Խոսելով Ադրբեջանի արձագանքի մասին՝ փորձագետը նշեց, որ այն նույնպես կանխատեսելի էր: «Բնականաբար, Ադրբեջանը հերթական անգամ այն չճանաչեց, ինչն ընդհանրապես նույնպես հարկ էր սպասել»,- եզրափակեց Իսկանդարյանը:
Հիշեցնենք, որ հուլիսի 19-ին Լեռնային Ղարաբաղի Հանարապետությունում անցումային շրջանի համար նախագահական ընտրություններ են կայացել: Նա ընտրվել է խորհրդարանի հատուկ նիստի ժամանակ: Գաղտնի քվեարկության արդյունքներով Լեռնային Ղարաբաղի Հանրապետության գործող նախագահ Բակո Սահակյանը 28 ձայն է ստացել: Ընտրություններն ընթացել են 2017 թվականի փետրվարի 20-ին ընդունված նոր Սահմանադրության համաձայն, որով նախատեսվում էր կառավարման կիսանախագահական համակարգից նախագահականին անցում: 2020 թվականից հետո համաժողովրդական ընտրություններ կանցկացվեն, եւ նախագահը կընտրվի 5 տարի ժամկետով:
