Հայաստանի ԱԳ նախարարի տեղակալ Աշոտ Հովակիմյանն ընդունել է Նյու Յորքից ժամանած ՄԱԶԾ քաղաքականության եւ ծրագրերի աջակցության գրասենյակի Կայուն զարգացման նպատակների ինտեգրման, խթանման եւ քաղաքականության մշակման աջակցության փորձագետներին:
Հայաստանի ԱԳՆ-ից NEWS.am-ին հայտնում են, որ պատվիրակության այցի նպատակն էր ծանոթանալ ՀՀ կողմից ՄԱԿ-ի կայուն զարգացման նպատակների (ԿԶՆ) ազգայնացման գործընթացին, աջակցել ԿԶՆ-ների իրականացման ճանապարհային քարտեզի եւ բարեփոխումների օրակարգում ընդգրկված համապատասխան ռազմավարական փաստաթղթերի մշակմանը:
Նախարարի տեղակալ Հովակիմյանը ներկայացրել է ՀՀ կողմից «Կայուն զարգացման 2030 օրակարգ»-ի իրակացման համար որդեգրած ռազմավարությունը՝ հիշատակելով ՀՀ ակտիվ ներգրավվածությունը եւ արդյունավետ համագործակցությունը ՄԱԿ-ի կառույցների հետ Հազարամյակի մարտահրավերների նպատակների իրականացման գործընթացի ընթացքում:
Նշենք, որ Կայուն զարգացման նպատակների 2030 օրակարգը ընդունվել է ՄԱԿ–ի 2015թ. գագաթաժողովի ընթացքում, որն ուժի մեջ է մտել 2016թ. հունվարի 1-ին: Այն ներառում է 17 նպատակ, որոնք իրենց հերթին կազմված են 169 թիրախից՝ ներառելով մեր առօրյա կյանքի բոլոր ոլորտները՝ աղքատության հաղթահարում, տնտեսական համաչափ զարգացում, առողջապահություն, կրթություն, բնապահպանություն եւ այլն: Այն համարվում է Հազարամյակի մարտահրավերների նպատակների տրամաբանական շարունակությունը:
