Բեմին վեհաշուք ու հանգիստ սահող աղջիկներ ու առնականություն ցուցադրող տղամարդիկ՝ վրացական ազգային երգի ու պարի «Ռուստավի» անսամբլի ելույթով Երեւանում նշել են Հայաստանի ու Վրաստանի դիվանագիտական հարաբերությունների սահմանման 25-ամյակը։

Միջոցառումը, որը նվիրված է այդ կարեւոր իրադարձությանը, կայացել է Արամ Խաչատրյանի համերգասրահում ու սկսվել է Հայաստանում Վրաստանի դեսպան Գեորգի Սաղանելիձեի ողջույնի խոսքով։ Դիվանագետը նշել է՝ կարեւոր է ոչ միայն բարիդրացիական հարաբերությունները պահպանելը, այլեւ նոր բարձունքներ նվաճելը։

«Չնայած երկրների արտաքին քաղաքականության տարբեր վեկտորներին՝ մենք անում ենք հնարավոր ամեն ինչ մեր հարաբերությունները խորացնելու ու զարգացնելու համար»,- հավելել է դեսպանը։

Հետո հավաքվածներին է դիմել Հայաստանի փոխարտգործնախարար Շավարշ Քոչարյանը ։ Նրա խոսքով, հանրապետությունների միջեւ քաղաքական երկխոսության բարձր մակարդակի մասին են վկայում ավելի քան 80 ստորագրված պայմանագրերն ու համաձայնագրերը։

Իսկ հետո դահլիճը հայտնվեց վրացական ռիթմի կախարդանքի ներքո։ Հպարտ կեցվածքով ու լարի պես ձիգ մեջքով պարողները զարմացնում էին իրենց բարձր ցատկերով, մատների վրա պարելու ու ծնկերի վրա պտտվելու հմտությամբ։ Աղջիկները մեղմ ու նրբագեղ սահում էին հատակով, ասես լճի հարթ մակերեսի վրայով։ Պարողներին բեմի վրա փոխարինելու եկան երգիչները՝ օգնելով միմյանց ստեղծել իսկական շոու։