Երեւանի Ավան եւ Նոր Նորք վարչական շրջանների ընդհանուր իրավասության դատարանում, այսօր՝ հուլիսի 27-ին, «Սասնա ծռերի» գործով դատական նիստն ընթանում է լարված մթնոլորտում:
NEWS.am-ի թղթակիցը հաղորդում է, որ դատավոր Արտուշ Գաբրիելյանը նիստերի դահլիճ հրավիրեց գործով բոլոր ամբաստանյալներին՝ իրազեկելու նրանց իրավունքների ու պարտականությունների մասին, այնուհետեւ նրանց կրկին դուրս բերեցին նիստերի դահլիճից. այդ ընթացքում միջադեպ տեղի ունեցավ դատավորի եւ Արամ Մանուկյանի փաստաբան Հրանտ Գեւորգյանի միջեւ:
Երբ պաշտպաններից Մուշեղ Շուշանյանի պաշտպանյալը դատավորից բացատրություն պահանջեց, թե ինչու իր փաստաբանին թույլ չեն տալիս ներկայանալ նիստերին, դատավորը նշեց, որ ոչ թե թույլ չեն տալիս, այլ Շուշանյանն ինքը չի ներկայանում նիստերին: Այս երկխոսությանը միջամտեց պաշտպան Հրանտ Գեւորգյանը՝ հայտարարելով, որ իրականում դատական կարգադրիչները Շուշանյանին թույլ չեն տալիս ներկայանալ, որովհետեւ ցանկանում են խուզարկել նրան, իսկ Շուշանյանն էլ թույլ չի տալիս:
Պաշտպանի այս միջամտությունը վրդովվեցրեց Արտուշ Գաբրիելյանին, որը համարելով, որ նա անհարգալից վերաբերմունք է դրսեւորում դատարանի նկատմամբ եւ խոսում է առանց դատավորի թույլտվության, ընդմիջում հայտարարեց եւ հեռացավ խորհդակցական սենյակ՝ քննարկելու Հրանտ Գեւորգյանի նկատմամբ սանկցիա կիրառելու հարցը: