Տավուշի մարզի Բերդի տարածաշրջանի Պառավաքար գյուղի պաշտպանական դիրքում հուլիսի 28-ին, Ադրբեջանի զինուժի կրակոցից վիրավորված պայմանագրային զինծառայող Արթուր Մայրանյանի առողջական վիճակը կայուն է։ Այս մասին NEWS.am-ի հետ զրույցում հայտնել է ՊՆ խոսնակ Արծրուն Հովհաննիսյանը։ Նա նշել է, որ դրական փոփոխությունն է նկատվել։ Մենք տեղեկացանք, որ Երեւանի հոսպիտալում գտնվող զինծառայողին չեն վիրահատել, հիվանդասենյակում է։
Նշենք, որ Արթուր Մայրանյանը երկու անչափահաս երեխաների հայր է, ընտանիքի միակ կերակրողն է, ունի ծեր ծնողներ, ամուսնացած է։ Պառավաքարի գյուղապետ Ռոլանդ Մարգարյանը NEWS.am-ի հետ զրույցում նշել էր, որ կոտրվել են զինծառայողի թեւի ոսկորները, նաեւ վնասվել է մեջքի փափուկ մասը: Նրան Բերդի զինվորական հոսպիտալից տեղափոխել են Կենտրոնական զինվորական հոսպիտալ: