Հայ-իրանական հարաբերություններում զգալի տեղ կարող է զբաղեցնել տրանսպորտի բնագավառում համագործակցությունը։ Այդ մասին իրանական «Իրնա» գործակալությանը տված հացազրույցում ասել է նախագահ Սերժ Սարգսյանը։
«Մեր երկկողմ հարաբերություններում, կարծում եմ, զգալի տեղ կարող է զբաղեցնել տրանսպորտի բնագավառում համագործակցությունը, որի մաս է կազմում Պարսից ծոց-Սեւ ծով միջազգային տրանսպորտային միջանցքի ծրագիրը, ինչը չի սահմանափակվում միայն երկկողմ ձեւաչափով, այլ հստակ տարածաշրջանային ուղղվածություն ունի: «Պարսից ծոցից-Սեւ ծով ճանապարհային միջանցք» անվանումը կրող տարանցիկ ճանապարհային ցանցի ստեղծման ծրագիրը հիանալի հնարավորություն է ընձեռում զարգացնելու Հայաստանի, Իրանի, Վրաստանի, Բուլղարիայի եւ Հունաստանի ենթակառուցվածքային ծրագրերը, նպաստելու համագործակցող երկրների տնտեսական զարգացմանը»,- ասելէ Սարգսյանը:
Նրա խոսքով, այս տեսլականում նախատեսվում են նաեւ մուլտիմոդալ փոխադրումների իրականացման ծրագրերը` ուղղված Իրանից Հայաստանի տարածքով եվրոպական երկրներ եւ հակառակ ուղղությամբ բեռնափոխադրումների ակտիվացմանը եւ ապրանքաշրջանառության ծավալների մեծացմանը:
«Ինչ վերաբերում է միջազգային տրանսպորտային այդ միջանցքի հայաստանյան ճանապարհային հատվածին, ապա նշեմ, որ Հայաստանի իշխանությունները մեծածավալ աշխատանքներ են իրականացնում՝ դրանք ավելի բարեկարգելու եւ տարանցիկ հնարավորությունները բարձրացնելու նպատակով: Նմանատիպ նախաձեռնություններից է «Հյուսիս-Հարավ ճանապարհային միջանցք» ներդրումային ծրագիրը: Հատելով Հայաստանի ամբողջ տարածքը հարավից մինչեւ հյուսիս՝ այն միանում է Փոթիի եւ Բաթումի նավահանգիստներ տանող ճանապարհին, նաեւ՝ դեպի Ռուսաստան, ԱՊՀ եւ եվրոպական երկրներ ձգվող վրացական ճանապարհի հարավային հատվածին: Շահագործումից հետո այս ուղին էապես կկրճատի ՀՀ տարածքում ճանապարհի վրա ծախսվող ժամանակը եւ կմեծացնի տարանցման հնարավորություններն ու որակը: Այն հնարավորություն կտա իրանական ապրանքներին նվազագույն ծախսերով, անվտանգ ուղիով եւ կարճ ժամկետներում մուտք գործել եվրոպական շուկա, ինչպես նաեւ՝ ներգրավելու բեռների տարանցումն այլ երկրներից»,- ասել է Սարգսյանը: