Հայաստանի էլեկտրականության շուկայի ազատականացման ծրագիրը կարող է ավարտվել 2019-ին։ Այս մասին NEWS.am-ի թղթակցին հայտնել է Հանրային ծառայությունների կարգավորման հանձնաժողովի սակագնային քաղաքականության վարչության ղեկավար Գարեգին Բաղրամյանը՝ մեկնաբանելով համապատասխան ռազմավարությունը, որը ընդունվել է Կառավարության՝ հուլիսի 27-ի նիստի ժամանակ։
Բարեփոխման հիմնական գաղափարն է անել այնպես, որ էլեկտրականության սակագինը հնարավոր լինի ընտրել մի քանի մատակարարների առաջարկներից։ Իսկ նրանք կմրցակցեն այն հարցում, թե ով ավելի շահավետ կգնի էլեկտրականությունը կայաններից ու ավելի էժան կվաճառի։
Ո՞վ կկարողանա պայմանավորվել գնի մասին՝ տեղական իշխանություննե՞րը , համայնատիրություննե՞րը, թե՞ յուրաքանչյուր տունն ինքնուրույն։ Այս ու մյուս սցենարները կմոդելավորեն համակարգչային ծրագրով, որը պատվիրել է Հայաստանի էներգետիկ ենթակառուցվածքների ու բնական պաշարների նախարարության հաշվարկային կենտրոնը։
Էլեկտրացանցը նախկինի պես մեկն է լինելու ( երկրորդ էլեկտրացանց ունենալը թանկարժեք ու անիմաստ է)։ Բայց դրա միջոցով էլեկտրականություն կկարողանան ուղարկել արդեն մի քանի մատակարարներ։
Շուկան շուկա, բայց հանձնաժողովը չի ցանկանում ամբողջովին չեղարկել ֆիքսված սակագները ։ «Մեր սպառողները պետք է երաշխավորված մատակարար ունենան։ Եթե որեւէ մեկին ձեռնտու չեն պայմանագրային սակագները, նա պետք է իմանա, որ միշտ կարող է ապավինել ֆիքսված սակագներին»,- նկատել է Բաղրամյանը։
Առաջիկա մի քանի տարիներին մատակարարն է լինելու «Հայաստանի էլեկտրացանցերը»։ Բայց նրանք պայմանագրային սակագներ չեն առաջարկելու՝ միայն ֆիքսված սակագներ, ինչպես հիմա։ «Հակառակ դեպքում, եթե մի սուբյեկտը ունի էլեկտրացանց ու մրցակցում է դրա մյուս օգտատերերի հետ, դա կարող է անհավասար պայմաններ ստեղծել»,- նկատեց Բաղրամյանը։
Մինչեւ 2018-ի կեսերը պետք է կազմել շուկայի մոդելների վերլուծությունը, իսկ ընդհանուր ազատականացումը ավարտել մինչեւ 2019-ի հուլիս ։ Մինչ այդ պետք է սկսի իր աշխատանքը ԵՏՄ միասնական էներգետիկ շուկան։
Հանձնաժողովն արդեն մշակել է էներգետիկ շուկայի կոմերցիոն կանոններ ու ուզւոմ է դրանք ներկայացնել իր նիստի ժամանակ, օգոստոսի 9-ին։
