Մոսկվայի հյուսիս արեւմուտքում, «Օտկրիտիե Արենա» մարզադաշտի մոտ անհայտ անձը դանակով վիրավորել է Հայաստանի քաղաքացուն, հայտնել է «Մոսկվա» քաղաքային լուրերի գործակալությունը՝ վկայակոչելով իրավապահ մարմիններում իր աղբյուրը։
Գործակալության զրուցակցի խոսքով, օգոստոսի 5-ին մոսկովյան հիվանդանոց է տեղափոխվել Հայաստանի 33-ամյա քաղաքացի՝ դանակային վիրավորումով։ Տղամարդու մոտ բացահայտվել են նաեւ գլխի վնասվածքներ ու կապտուկներ։
«Օպերատիվ աշխատակիցները պարզել են, որ միջադեպը տեղի է ունեցել «Օտկրիտիե Արենա» մարզադաշտի մոտ՝ Վոլոկոլամսկի մայրուղու վրա։ Տուժածի ու անհայտ անձի միջեւ վեճ է սկսվել, որի ընթացքում վերջինը ծեծել է Հայաստանի քաղաքացուն ու դանակով հարվածել նրա որովայնին, հետո փախուստի դիմել»,- պատմել է աղբյուրը։
Հարուցվել է քրեական գործ միտումնավոր կերպով առողջությանը ծանր վնաս հասցնելու մասին, հանցագործին որոնում են։